ყალბი დოკუმენტების საკითხზე სასამართლოს მიმღებს რადიო "ათინათი" რამდენჯერმე დაუკავშირდა, სადაც განაცხადეს, რომ ზუგდიდის რაიონულ სასამართლოში, ყალბი დიპლომის დამზადების ბრალდებით დაკავებული სამი პირის საქმეზე აღკვეთი ღონისძიების მოთხოვნა ამ დრომდე არ შესულა. შინაგან საქმეთა სამინისტროს სამეგრელო-ზემო სვანეთის სამხარეო პოლიციის მთავარი სამმართველოს თანამშრომლებმა, მიღებული ოპერატიული ინფორმაციის საფუძველზე, ჩატარებული საგამოძიებო და ოპერატიული ღონისძიებების შედეგად, ყალბი დოკუმენტის დამზადება-გასაღების ბრალდებით სამი პირი დააკავეს. გამოირკვა, რომ კოლეჯ „გამა"-ს დირექტორი გიორგი ფ. ზუგდიდის სასწავლო უნივერსიტეტის რეფერენტი ირმა კ. და ამავე დაწესებულების ხარისხის უზრუნველყოფის სამსახურის უფროსი სპეციალისტი ხათუნა შ. ფულადი სარგებლის მიღების სანაცვლოდ ყალბ დიპლომებს ამზადებდნენ. აღნიშნულ პირებს, პირადი ჩხრეკისას, სამართალდამცავების მიერ წინასწარ დანიშნული თანხა - 1500 ლარი აღმოაჩნდათ. პოლიციის მიერ, ასევე ამოღებულია კონკრეტული პიროვნების სახელზე გამზადებული ყალბი დიპლომი. სამივე დაკავებული აღიარებს ჩადენილ დანაშაულს. გამოძიებას შინაგან საქმეთა სამინისტროს სამეგრელო-ზემო სვანეთის სამხარეო პოლიციის მთავარი სამმართველო აწარმოებს საქართველოს სსკ-ის 362-ე მუხლის პირველი ნაწილით. ჩადენილი დანაშაული სამ წლამდე თავისუფლების აღკვეთას ითვალისწინებს,- ნათქვამია შსს-ს განცხადებაში.