ზუგდიდის მუნიციპალიტეტის ტერიტორიაზე სხვადასხვა კომპაქტურ ჩასახლებებში და კერძო ბინებში მცხოვრები დევნილები დღეს ოკუპირებული ტერიტორიებიდან იძულებით გადაადგილებულ პირთა განსახლებისა და ლტოლვილთა მინისტრის მოადგილეს მამუკა ცოტნიაშვილსა და აჭარისა და სამეგრელო–ზემო სვანეთის დევნილთა სამმართველოს უფროს ირაკლი ქოჩუას შეხვდნენ. სამმართველოს შენობაში მისული დევნილები მინისტრის მოადგილეს თავიან პრობლემებზე ესაუბრნენ. მათი უმრავლესობა საცხოვრებელი ფართების უქონლობასა და მძიმე საყოფაცხოვრებო პირობებს უჩიოდა. დევნილებმა ცოტნიაშვილს ზუგდიდში დაგეგმილი დევნილთა საცხოვრებელი კორპუსების აშენებამდე ალტერნატიული ფართის გამოყოფა თხოვეს. რამდენიმე მათგანმა მინისტრის მოადგილეს ალტერნატიული ფართების სახით ქალაქში მდებარე  ცარიელ ობიექტზე მიუთითა.  დევნილმა ქეთვან ჯობავამ "ათინათთან" საუბარში განაცხადა, რომ მან ცოტნიაშვილს ყოფილი პოლიტექნიკური კოლეჯის შენობა, თბილისის ქუჩაზე მდებარე ჩაის ფილიალის შენობისა და მოზრდილთა პოლიკლინიკის შენობაზე მიაწოდა ინფორმაცია. მისივე განცხადებით მინისტრის მოადგილე დაპირდა, რომ მათ წინადადებებს გაითვალისწინებს და დღის ბოლომდე თავადაც მოაწვდის ინფორმაციას იმ ობიექტების შესახებ, სადაც მშენებლობების დასრულებამდე დევნილთა ცხოვრება შესაძლებელი იქნება. შეხვედრაზე ასევე იმყოფედონენ „დევნილთა საინიციატივო ჯგუფის“ წარმომადგენელი თეონა ქარდავა და „დევნილთა სამოქალაქო მოძრაობის“ წარმომადგენელი მანანა გაბელაია. თეონა ქარდავა ცოტნიაშვილს ზედაეწერის კომპაქტურ ჩასახლებაში მცხოვრები დევნილების მძიმე მდგომარეობაზე ესაუბრა  და ასევე კარავის დევნილების პრობლემებსაც შეეხო. მინისტრის მოადგილის განცხადებით ის ყველა დევნილის პრობლემას მოისმენს და მათთან თანამშრომლობის გზით ეტაპობრივად იზრუნებს პრობლემების მოგვარებაზე.