სენაკში „ქართული ოცნება - დემოკრატიული საქართველოს" რაიონული ორგანიზაციის თავმჯდომარედ ყოფილი მორაგბე და საქართველოს ნაკრების მწვრთნელი დავით კილასონია აირჩიეს. კონფერენციაზე „ქართული ოცნების" მხარდამჭერთა ნაწილს მანდატი არ მიუღია, რამაც მათი განაწყენება გამოიწვია. მანდატის გარეშე დარჩენილები კილასონიას „ნაციონალურ მოძრაობასთან“ და სენაკის მაჟირიტარ დეპუტატ გურამ მისაბიშვილთან კავშირში ადანაშაულებენ. „ქართული ოცნების“ აქტივისტი და უმანდატოდ დარჩენილი მზია გადელია, მედიასთან საუბარში აცხადებს, რომ კილასონიას სახით რაიონულ ბიუროს „ნაციონალი“ ხელმძღვანელი ჰყავს. მისივე თქმით, ის გაუძღვება გუნდს და  პრემიერ-მინისტრის რეზიდენციასთან უვადო შიმშილობის აქციას გამართავენ. თუმცა მანდატიანების რიგებში კილასონიას კანდიდატურას დადებითად აფასებდნენ და უმანდატო აქტივისტებს,, ყოფილი ხელისუფლებისაგან მართულებს უწოდებენ. „ქართული ოცნების“ მხარდამჭერი ინგა ქარდავა დავით კილასონიას თავჯდომარედ არჩევის ფაქტს მიესალმება და აღნიშნავს, რომ კილასონია არის ღირსეული კანდიდატი, ხოლო უმანდატოდ დარჩენილი აქტივისტები არიან „ნაციონალური მოძრაობის“ საბოტაჟის შემსრულებლები. თავის მხრივ დავით კილასონია მედიასთან საუბარში აცხადებს რომ, ის „ქართული ოცნების“ წინასაარჩევნო პროგრამის განხორციელებას თავის გუნდთან ერთად შეეცდება. მომავალ გეგმებთან დაკავშირებით კი კილასონიას ურჩევნია რომ საქმე გააკეთოს და იმან  გამოაჩინოს ვიდრე გეგმებზე წინასწარ ისაუბროს.