ზუგდიდის მუნიციპალიტეტის საკრებულოს აპარატის თანამშრომელი და სამეგრელოს ახალგაზრდული საინიციატივო ჯგუფის წევრი ანა წითლიძე „ფეისბუკის“ საკუთარ გვერდზე გამოქვეყნებულ განცხადებაში მისი ოჯახის წევრების მიმართ ზეწოლასა და მუქარებზე საუბრობს. ანი წითლიძე დიდუბე-ჩუღურეთის პოლიციის სამმართველოს და შს მინისტრ ირაკლი ღარიბაშვილს მიმართავს. მიმართვის ტექსტს რადიო „ათინათი“ უცვლელად გთავაზობთ: „დიდუბე ჩუღურეთის სამოქალაქო ფორმაში გადაცმული პოლიცლელების ქმედება, დაკავებისას მოქალაქე ვლადიმერ წითლიძეს ცემა (მას 4 პოლიციელი ურტყამდა) სცილდება კანონის ჩარჩოებს, არღვევს მოქალაქის უფლებას პირადი ხელშეუხებლობის შესახებ. მე არ მინდა პოლიტიკური შეფასება მივცე ამ ფაქტს და დავუკავშირო ჩემს აქტიურ პოლიტიკურ პოზიციას და ოპონენტობას, თუმცა ამ ფაქტის პოლიციის მხრიდან მიჩქმალვის მცდელობა უკვე ეჭვს იწვევს. მოგმართვათ თხოვნით, დააყენოთ დიდუბე-ჩუღურეთის სამმართველოს იმ პოლიციელების პასუხსიმგებლობის საკითხი ვინც დაკავებისას ფიზიკური და სიტყვიერი შერაცხყოფა მიაყენა ჩემს ძმას, რომ ამით აღმოიფხვრას პრეცენდენტი პოლიციის მხრიდან უკანანო ქმედებზე.“ ანი წითლიძე დასძენს, რომ ის არ ამტკიცებს თითქოს აღნიშნული ფაქტი მასზე პოლიტიკური ზეწოლის მცდელობა იყო: “ მე ვამბობ ფაქტს; 19 თებერვალი ზუსტად ის პერიოდია, როდესაც ჩემზე განხორციელდა მუქარის ზარები! გარდა ამისა რატომ გახდა აუცილებელი სემინარიის სტუდენტის სასტიკი ცემა 4 თანამშრომლის მიერ სულ რომ დამნაშავე და რეციდივისტი ყოფილიყო!!!“ შინაგან საქმეთა სამინისტრო კი, კონკრეტულ საკითხთან დაკავშირებით განცხადებას მაშინ გააკეთებს, თუ დაზარალებული პირი აღნიშნულ უწყებას ოფიციალურად მიმართავს.