სენაკის მუნიციპალიტეტის საკრებულოს სხდომაზე ერთ-ერთ მთავარ საკითხად  გამგებლის, თენგიზ ადამიას თანამდებობიდან გათავისუფლების საკითხი განიხილეს. როგორც  სენაკის საკრებულოს თავმჯდომარე მურად შამათავა, რადიო „ათინათთან“ საუბარში აცხადებს. სენაკის  გამგებლის თენგიზ ადამიას დაკავებული თანამდებობიდან გათავისუფლების შესახებ სხდომაზე დღეს იმსჯელეს. ასევე მისი განმარტებით აღნიშნულ საკითხზე გადაწყვეტილება საკრებულომ ხმების თანაბრად გადანაწილების გამო ვერ მიიღეს. ადამიას მუშაობას საკრებულოს თავმჯდომარე  არადამაკმაყოფილებლად აფასებს და დასძენს, რომ აღნიშნულ საკითხს თვის ბოლოს სხდომაზე განსახილველად  აუცილებლად გაიტანენ. თავის მხრივ სენაკის გამგებელი რადიო „ათინათთან“საუბარში აცხადებს, რომ დღეს გამართულ საკრებულოს სხდომაზე ხმები არათუ გაიყო არამედ 20-მა დეპუტატმა ხმა, მისი თანამდებობიდან გადაყენების წინააღმდეგ მისცა. მისივე ინფორმაციით, სხდომას სულ 24 დეპუტატი ესწრებოდა. ასევევ ადამია გამოეხმაურა საკრებულოს თავმჯდომარის მიერ  რადიო „ათინათისთვის“ მიცემულ კომენტარის იმ ნაწილს, სადაც საკრებულოს თავმჯდომარე აცხადებს, რომ მომავალ სხდომაზე აღნიშნული საკითხის განხილვა ისევ მოხდება. რაც გამგებლის თენგიზ ადამიას განცხადებით საკრებულოს თავმჯდომარეს კანონი არ აძლევს საშუალებას საკითხის სხდომაზე ხელახლა  იქნეს გატანილი. კომენტარის ბოლოს ადამია დასძენს, რომ ის არ აპირებს დაკავებული თანამდებობიდან გადადგომას.