კონფრენცია საქართველოს პარლამენტის ტერიტორიული მთლიანობის აღდგენის კომისიის თავმჯდომარის, გია ვოლსკისა და იმ არასამთავრობო ორგანიზაციების ინიციატივით ჩატარდა, რომლებიც სახალხო დიპლომატიისა და კონფლიქტების ტრანსფორმაციის პროცესში არიან ჩართულები. შეხვედრაზე კონფლიქტების მოგვარების ახალი რეალისტური ხედვების შემუშავებაზე იმსჯელეს და კონკრეტული იდეები და რეკომენდაციები განიხილეს. კონფერენციის ერთერთმა ორგანიზატორმა ასოციაცია „მშვიდობიანი და საქმიანი კავკასიის“ წარმომადგენელმა ალუ გამახარიამ "ათინათთან" საუბარში აღნიშნა, რომ 2008 წლამდე ქართულ-აფხაზური კონფლიქტის პოზიტიური ტრანსფორმაციის საკითხზე ეკონომიკური ფაქტორების გააქტიურების კუთხით მიმდინარეობდა მუშაობა, 2008 წლის ოკუპაციამ კი ქართულ–აფხაზურ ეკონომიკურ კავშირებს სერიოზული დარტყმა მიაყენა. მისივე თქმით დღეს მოქმედი კანონმდებლობის თანახმად, ყველანაირი ეკონომიკური აქტივობა ისჯება, რაც ჩვეულებრივ მოსახლეობას ზღუდავს. ალუ გამახარია მიიჩნევს, რომ ამ ეტაპზე ურთიერთობების მოგვარებისა და საზღვარზე კონტროლის შემსუბუქების ორი გზა არსებობს: სახელისუფლებო და სახალხო დიპლომატია.

საქართველოს პარლამენტის ტერიტორიული მთლიანობის აღდგენის კომისიის თავმჯდომარე, გია ვოლსკი მიიჩნევს, რომ კონფლიქტის მოგვარების გზები და სტრატეგიები განსაკუთრებულ სიახლეებს არ განიცდის. შეხვედრის მიზანი კი ხალხის დამოკიდებულების განსაზღვრა იყო. „საკმაოდ საინტერესო წინადადებებია, შემდეგი თვის ბოლოს ამ წინადადებებს შევკრებთ და სტრატეგიული გეგმის სახით წარმოვადგენთ", - აღნიშნავს ვოლსკი.