არასამთავრობო ორგანიზაცია „დევნილი ქალები საკუთარი უფლებების დასაცავად„ წარმომადგენელმა ნონა უბილავამ კოლექტიურ ცენტრებში მაცხოვრებელი დევნილებისა და ყოფილი მეომრების (პარტიზანების) სახელით განცხადება გააკეთა და აღნიშნა, რომ ისინი აფხაზეთის მინისტრთა საბჭოს თავმჯდომარის პოსტზე დალილა ხორავას კანდიდატურას უჭერენ მხარს. შეგახსენებთ, რომ აფხაზეთის მინისტრთა საბჭოს ყოფილმა თავმჯდომარემ გიორგი ბარამიამ თანამდებობის დატოვების შესახებ განცხადება გუშინ დაწერა. ნონა უბილავას განცხადებით აღნიშნულ პოსტზე წარდგენილ კანდიდატთა შორის დევნილთა დიდი ნაწილისთვის დალილა ხორავას კანდიდატურაა მისაღები. დალილა ხორავა 2007-2010 წლებში აფხაზეთის ლეგიტიმური მთავრობის ჯანდაცვის მინისტრის პოსტს იკავებდა. მისი განთავისუფლების შესახებ გადაწყვეტილება აფხაზეთის მთავრობის იმჟამინდელმა თავმჯდომარემ, გია ბარამიამ მიიღო. ბარამია დალილა ხორავას განთავისუფლების მიზეზად სხვადასხვა სახის საბიუჯეტო გარღვევებს ასახელებდა. ნონა უბილავა კი მედიასთან საუბარში განმარტავს, რომ დალილა ხორავს მინისტრობის პერიოდში ოკუპირებულ ტერიტორიაზე ძალიან მნიშვნელოვანი პროქტები იქნა განხორცილებული. ამჟამად იგი ხელმძღვანელობს ორგანიზაციას „საქართველო დევნილთა მხარდაჭერისთვის“. „ქალბატონი დალილას მიერ ამ ეტაპზე მოპოვებულია მილიარდიანი პროექტი. პროექტს ევროკავშირი აფინანსებს და მის ფარგლებშიც გაუმჯობესდება დევნილთა საყოფაცხოვრებო პირობები და აშენდება ახალი საცხოვრებელი სახლები“,-აღნიშნავს ნონა უბილავა. მისივე განცხადებით დალილა ხორავას მხარდაჭერის მიზნით დღეს და ხვალ დევნილთა კოლექტიურ ცენტრებში შეხვედრები გაიმართება.