ყოვლადწმინდა ღვთისმშობლის შობის დღესთან დაკავშირებით, ზუგდიდის ვლაქერნის ღვთისმშობლის სახელობის ხატის საკათედრო ტაძარში სადღესასწაულო წირვა-ლოცვა მეუფე გერასიმემ აღავლინა. წირვის დასრულების შემდეგ, ზუგდიდისა და ცაიშის მიტროპოლიტმა ქადაგებისას მრევლს მეტი ლოცვისკენ მოუწოდა და აღნიშნა, რომ ღვთისმშობლის შესამოსელის ზუგდიდში დარჩენა მრევლის ვედრებასა და ლოცვაზეა დამოკიდებული. ამასთან, ტაძრის ეზოში შეკრებილმა მრევლმა,ღვთისმშობლის შესამოსელის ზუგდიდიდან გატანის წინააღმდეგ მოთხოვნით, ხელმოწერების შეგროვება დაიწყო. „დედაღვთისმშობელმა დაგვანახა ჩვენ, იმ ადამიანებს, რომლებსაც გვერგო ეს დიდი წყალობა – იგი აქ იმყოფებოდეს და ჩვენ ვერ ვუფრთხილდებით მას, ჩვენ არ ვლოცულობთ, არ წარმოვთქვამთ მის სადიდებელ ლოცვებს. ღმერთმა დაგვიფაროს, რომ დედაღვთისმშობელმა გვიწყინოს, დედაღვთისმშობელმა მიიღოს სხვა გადაწყვეტილება“, – აღნიშნა მეუფე გერასიმემ ქადაგებისას.  მართლმადიდებელი სამყარო დღეს, 21 სექტემბერს, ყოვლადწმინდა ღვთისმშობლის შობის დღეს აღნიშნავს. ყოვლადწმინდა ღვთისმშობელი გალილეის პატარა ქალაქ ნაზარეთში დაიბადა. მამა, მართალი იოაკიმე, დავით მეფის ტომიდან იყო, ხოლო დედა, მართალი ანა – პირველი მღვდელმთავრის აარონის შთამომავალი. ღვთისმოშიშ ცოლ-ქმარს შვილი ხანდაზმულ ასაკში შეეძინა. მათ აღთქმა დადეს, თუ ღმერთი შვილს მისცემდათ, ახალშობილს ტაძარში მსახურებისთვის უფალს მიუძღვნიდნენ. უფალმა იოაკიმესა და ანას ლოცვა-ვედრება შეისმინა.