დღეს ქალაქ ზუგდიდის საკრებულომ დეპუტატთა ეთიკის საკუთარი კოდექსი ერთხმად დაამტკიცა. კოდექსის პროექტი ფრაქციამ “ზუგდიდის მომავლისთვის” შეიმუშავა. ზუგდიდი არის პირველი ქალაქი საქართველოში, რომელსაც საკუთარი ეთიკის კოდექსი გააჩნია. მისი მიზანია დაადგინოს საკრებულოს წევრების მაღალი პროფესიული და ეთიკური სტანდარტები და ასევე, ხელი შეუწყოს დეპუტატების მოვალეობების ღირსეულად და კეთილსინდისიერად შესრულებას. ახლად დამტკიცებული ეთიკის კოდექსის პრინციპებია: საქართველოს სახელმწიფოსა და ხალხის ერთგულება, ადამიანის უფლებების, თავისუფლებისა და ღირსებების პატივისცემა, პატიოსნება, საქვეყნოობა, ანგარიშვალდებულება ამომრჩევლის წინაშე, კაცთმოყვარეობა და დათმენის უნარი, მიუხედავად პოლიტიკური შეხედულებისა, ტოლერანტობა და სხვ. ამავე კოდექსის მიხედვით, საკრებულოს წევრი ვალდებულია: დაიცვას საკრებულოს წევრთა ეთიკის კოდექსის მოთხოვნები, თავისი საქმიანობით გააუმჯობესოს საკრებულოსა და მისი სტრუქტურების მუშაობა, აქტიურად ითანამშრომლოს მასობრივი ინფორმაციის საშუალებათა წარმომადგენლებთან და ა.შ. აღნიშნული მოთხოვნების დარღვევის შემთხვევაში, შესაბამის ეთიკის ჯგუფს, რომელიც ამავე კოდექსით რეგულირდება, შეუძლია დისციპლინარული პასუხისმგებლობის ზომები მიიღოს. ესენია: წესრიგისკენ მოწოდება, გაფრთხილება, გაფრთხილება ოქმში შეტანით. დარღვევის ხასიათიდან და სიმძიმიდან გამომდინარე ეთიკის ჯგუფს ასევე შეუძლია გაასაჯაროვოს საკრებულოს წევრის ვინაობა ყველა კონკრეტულ შემთხვევაში. ქალაქ ზუგდიდის საკრებულოს თავმჯდომარე მერაბ ქვარაიამ ეთიკის კოდექსის პროექტის ავტორებს და საერთაშორისო ორგანიზაციის NDI  საქართველოს ოფისის წარმომადგენლებს, რომლებიც ასევე მუშაობდნენ აღნიშნულ პროექტზე, მადლობა გადაუხადა. "დარწმუნებული ვარ მოხდება ამ ინიციატივის ტირაჟირება ქართულ პოლიტიკურ სივრცეში, რაც საბოლოო ჯამში ხელს შეუწყობს პოლიტიკური კულტურისა და პოლიტიკური პასუხისმგებლობის ამაღლებას, ჭეშმარიტად დემოკრატიული ღირებულებების დამკვიდრებას ჩვენს ქვეყანაში” - თქვა საკრებულოს თავმჯდომარემ მერაბ ქვარაიამ.