საქართველოს პარლამენტში სახელმწიფო დაცვის სპეციალური სამსახურის ბიუჯეტის თანხების არამიზნობრივ ხარჯვასთან დაკავშირებით სავარაუდოდ სპეციალური საგამოძიებო კომისია შეიქმნება. საპარლამენტო უმრავლესობის წევრი გია ცაგარეიშვილი აცხადებს,რომ წინა და ახლანდელი მოწვევის პარლამენტში "ნაციონალური მოძრაობიდან" ძალიან ბევრი დეპუტატი დანაშაულებრივ კავშირებშია ჩართული. "შესაძლებელია საქართველოს პარლამენტში საგამოძიებო კომისია შეიქმნას, რომ ჩვენს კოლეგებს ვკითხოთ აქ პარლამენტში, რატომ იღებდნენ ისინი სამკაულებს, რატომ დადიოდნენ დუბაიში", - აღნიშნა ცაგარეიშვილმა. საპარლამენტო უმრავლესობის ლიდერის დავით საგანელიძის თქმით კი, ვინაიდან ამ სიაში ხშირად ოპოზიციონერი დეპუტატები ფიგურირებენ, კომისიაში მათი ყოფნა გარანტი იქნება, რომ გაიფანტება ეჭვები თითქოს ეს ანგარიშსწორების კომისიაა. "თავად ნახოს ეს ციფრები, თავად ნახონ ეს ჩეკები, სადაც მათი გვარებია მონიშნული და განმარტებებიც თავად გააკეთონ. ეს უფრო მეტ დამაჯერებლობას მისცემს იმ დასკვნას, რომელიც ამ საკითხთან დაკავშირებით შეიძლება დაიდოს", - აცხადებს საგანელიძეს.