ზუგდიდის მუნიციპალიტეტის საკრებულოს წევრს, კახა მიქაიას უახლოეს სხდომაზე შესაძლებელია უფლებამოსილება შუწყვიტონ. დეპუტატისთვის უფლებამოსილების ვადამდე შეწყვეტის შესახებ შესაბამისი კომისია დასკვნას ამზადებს და საკრებულოს უახლოეს სხდომაზე წარუდგენს. ამასთან, ამავე სხდომაზე საკრებულოს წევრები კიდევ ერთი დეპუტატის - ცოტნე მურღულიას უფლებამოსილების შეწყვეტის შესახებ იმსჯელებენ. კახა მიქაია თემის საკრებულოში პარტია „ქართული ოცნების“ პროპორციული სიით შევიდა, ხოლო ცოტნე მურღულია სოფელ კორცხელის მაჟორიტარი დეპუტატია პარტია "თავისუფალი დემოკრატებიდან". ადგილობრივი თვითმმართველობის კოდექსის მიხედვით, დეპუტატს უფლებამოსილება უწყდება, თუ ის არასაპატიო მიზეზით ზედიზედ 6 თვის განმავლობაში მუნიციპალიტეტის საკრებულოს მუშაობაში არ მონაწილეობდა. კახა მიქაიას საკრებულოს სხდომებს პროტესტის ნიშნად, გასული წლის 30 დეკემბრის შემდეგ არ ესწრება. საკრებულოს სამანდატო კომისიის თავმჯდომარე მაიზერ ნანავას თქმით, მათ კახა მიქაიას წერილი 2-ჯერ გაუგზავნეს, თუმცა ამ დრომდე პასუხი არ მიუღიათ. „კომისიას არანაირი დოკუმენტი არ გააჩნია იმისთვის, რომ კახა მიქაიას გაცდენები საპატიოდ ჩაუთვალოს“, - თქვა რადიო „ათინათთან“ საუბარში მაიზერ ნანავამ. საკრებულოს წევრი კახა მიქაია ამბობს, რომ საკრებულოს მისთვის უფლებამოსილება, გაცდენების გამო, ამ დრომდე უნდა შეეწყვიტა. მისი თქმით, კანონი ყველასთვის კანონი უნდა იყოს და ის უნდა აღსრულდეს. „ბოლოს შემპირდნენ, რომ უახლოს სხდომაზე განიხილავდნენ ჩემს საკითხს. ეს თანამდებობა მიჩუქნია მათთვის. თანამდებობა არასოდეს არ მაინტერესებდა და ბრძოლას მის გარეშეც ვაგრძელებ. ჩემი 25 წლიანი ბრძოლა, ქვეყანაში დემოკრატიის გასამარჯვებლად, ნატოსა და ევროკავშირისკენ სწრაფისათვის და იმისათვის, რომ ეს ქვეყანა საბოლოოდ მოწყდეს რუსულ ორბიტას, გრძელდება”, - თქვა კახა მიქაიამ. იმ შემთხვევაში, თუ საკრებულო ხმათა უმრავლესობით მიქაიას უფლებამოსილების შეწყვეტას შესახებ გადაწყვეტილებას მიიღებს, მისი ადგილმონაცვლე პარტია „ქართული ოცნების“ წევრი და ერთ-ერთი დამფუძნებელი ჯონი ზარანდია იქნება. გასული წლის 30 დეკემბერს ზუგდიდის მუნიციპალიტეტის საკრებულოს სხდომაზე დეპუტატმა კახა მიქაიამ საკრებულოს თავმჯდომარის ლაშა გოგიას იმპიჩმენტი მოითხოვა. ამის შემდეგ, მიქაიამ საკრებულოს სხდომებს ბოიკოტი გამოუცხადა. „მე მივიღე გადაწყვეტილება, სანამ ზუგდიდის საკრებულოს თავმჯდომარე იქნება სააკაშვილის კუდი-ს ყოფილი თანამშრომელი და “ზონდერების” ბრიგადირი, მე საკრებულოს სხდომებს არ დავესწრები“ - თქვა მაშინ კახა მიქაიამ. კახა მიქასიასგან განსხვავებით, საკრებულომ ცოტნე მურღულიასგან წარილი მიიღო, სადაც ის გაცდენების მიზეზად ქ. ლონდონში, უმაღლეს სასწავლებელში სწავლას ასახელებს. ამავე წერილში ის საკრებულოს დეპუტატებს თხოვნით მიმართავს, რომ გაცდენები საპატიოდ ჩაუთვალონ. თუ დეპუტატები მურღულიას თხოვნას არ გაითვალისწინებენ და მას უფლებამოსილება შეუწყდება.