დღეს ზუგდიდის მუნიციპალიტეტის საკრებულოს წევრებს კახა მიქაიას და ცოტნე მურღულიას საკრებულოს სხდომაზე დეპუტატის უფლებამოსილება ვადამდე შეუწყვიტეს. სამანდატო კომისიის თავმჯდომარე მაიზერ ნანავამ სხდომაზე განმარტა, რომ მიქაია და მურღულია, ბოლო 6 თვის განმავლობაში საკრებულოს სხდომებს არ დასწრებიან.  ადგილობრივი თვითმმართველობის კოდექსის თანახმად, ამ შემათხვევაში, მათ უფლებამოსილება უწყდებათ. შეგახსენებთ, კახა მიქაიას საკრებულოს სხდომებს პროტესტის ნიშნად გასული წლის 30 დეკემბრიდან არ დასწრებია, მას შემდეგ, რაც მან ზუგდიდის მუნიციპალიტეტის საკრებულოს სხდომაზე საკრებულოს თავმჯდომარის ლაშა გოგიას იმპიჩმენტი მოითხოვა. „მე მივიღე გადაწყვეტილება, სანამ ზუგდიდის საკრებულოს თავმჯდომარე იქნება სააკაშვილის კუდი-ს ყოფილი თანამშრომელი და “ზონდერების” ბრიგადირი, მე საკრებულოს სხდომებს არ დავესწრები“ – თქვა მაშინ კახა მიქაიამ. ცოტნე მურღულიამ საკრებულოს წერილით მიმართა, რომელშიც ის გაცდენების მიზეზად ქ. ლონდონში უმაღლეს სასწავლებელში სწავლას ასახელებდა. თუმცა, დეპუტატებმა მუღღულიას თხოვნა, გაცდენების საპატიოდ არ ჩათვლის შესახებ არ გაითვალისწინეს. კახა მიქაია, მომხდარზე კომენტარს, სავარაუდოდ, დღეს გააკეთებს და რადიო „ათინათი“ მას მოგვიანებით შემოგთავაზებთ.