2012 წლის არჩევნების შემდგომ პერიოდში თვითმმართველობებში განხორციელებული პოლიტიკური პროცესების მონიტორინგი „სამართლიანი არჩევნებისა და დემოკრატიის საერთაშორისო საზოდაგოებამ“ დემოკრატიული ჩართულობის ცენტრში წარმოადგინა. აღნიშნულ პერიოდში საქართველოს მასშტაბით განხორცილეებულ საკადრო ცვლილებებზე, საპროტესტო აქციებსა და თვითმმართველობის მოხელეთა მიმართ განხორციელებული სამართლებრივი დევნის შესახებ ინფრომაცია ანგარიშის სახით იყო წარმოდგენილი. ანგარიშის თანახმად: არჩევნებიდან დღემდე საქართველოს მასშტაბით 50-მა გამგებელმა დატოვა თანამდებობა, მათგან 48-მ პირადი განცხადების, ხოლო 2-მა საკრებულოს გადაწყვეტილებით. გამგებლის თანამდებობის დასაკავებლად კი კონკურსი მხოლოდ 15 მუნიციპალიტეტში ჩატარდა, უმეტეს შემთხვევაში კი ისინი საკრებულომ მოვალეობის დროებით შემსრულებლად დანიშნა. არჩევნების შემდგომ საკრებულოებში პოლიტიკურ ძალთა გადანაწილების პროცესი წარიმართა. ასევე „სამართლიანმა არჩევნებმა“ საპარლამენტო არჩევნების შემდეგ ადგილობრივ თვითმმართველობებში მიმდინარე საშტატო ცვლილებებიც შეისწავლა. ორგანიზაციამ ინფრომაცია საჯარო ინფორმაციების გამოთხოვითა და მედიაში გავრცელებული მასალების საფუძველზე მოაგროვა. მასალის შესწავლის შედეგად გამოიკვეთა, რომ არჩევნების შემდეგ საქართველოს მასშტაბით 1877 თანამშრომელია გათავისუფლებული, 69 მუნიციპალიტეტიდან 55 გამგეობასა და 26 საკრებულოში საკადრო ცვლილებები განხორციელდა, ხოლო 34 მუნიციპალიტეტში 425 რწმუნებული იქნა დათხოვილი. „გათავისუფლებულ პირთა უმრავლესობამ განცხადება საკუთარი სურვილით დაწერა. ბევრ მათგანს განცხადება ერთ დღეს აქვს დაწერილი, რაც ეჭვს იწვევს“,-ნათქვამია ანგარიშში. პარტიული ნიშნით შერჩევის ფაქტები გამოვლინდა 18 მუნიციპალიტეტში ახალი თანამშრომლის აყვანის დროს. კონკურსი მხოლოდ 6 მუნიციპალიტეტში ჩატარდა. ანგარიშის თანახმად პარტიული ნიშნით ძირითადად „ქართული ოცნების“ აქტივისტები და მხარდამჭერები დაინიშნენ. საანგარიშო პერიოდში ადგილობრივი თვითმმართველი ორგანოების საქმიანობით საგამოძიებო სამსახურების დაინტერესების ფაქტებიც გამოვლინდა, რამდენიმე შემთხვევაში სისხლის სამართლის საქმეც აღიძრა. „სამართლიანი არჩევნები“ მუნიციპალიტეტებში გამოვლენილ ტენდენციას უარყოფიდად აფასებს და მიაჩნია, რომ გამოვლენილი პრაქტიკა ხელს არ უწყობს საჯარო სამსახურების პოლიტიკური გავლენისგან გათავისუფლებას",-ნათქვამია ანგარიშის ბოლოს. შეხვედრას „საერთაშორისო გამჭვირვალობა საქართველოს“ ზუგდიდის ოფისის წარმომადგენლები და საკრებულოს აპარატის ერთი წევრი ესწრებოდა. გამჭვირვალობის ზუგდიდის ოფისის წარმომადგენელმა მალხაზ ჭკადუამ რადიო „ათინათთან“ აღნიშნა, რომ ადამიანები, რომლებიც საჯარო სამსახურებში არიან დასაქმებულები არ უნდა იყვნენ რომელიმე პოლიტიკური ძალის წარმომადგენელნი. მან ასევე ყურადღება გაამახვილა სამოქალაქო საზოგადოების როლზე თვითმმართველობის მუშაობის პროცესში. „თვითმმართველობა იმას ნიშნავს, რომ შენ ერთვები პროცესში და შენი გადასაწყვეტია რა მოუვა შენს ქალაქს ხვალ",-აღნიშნა მალხაზ ჭკადუამ.