„ადგილობრივი თვითმმართველობის მონიტორინგის საინიციატივო ჯგუფის“ ბაზაზე შექმნილმა არასამთავრობო ორგანიზაციამ: „სამოქალაქო მონიტორინგის და კვლევების ცენტი“, მეოთხე შუალედური ანგარიში წარმოადგინა. ანგარიში ზუგდიდის მუნიციპალიტეტის საკრებულოს საქმიანობას და საჯაროობის, გამჭვირვალობასა და კანონთან შესაბამისობას ეხებობა. შეხვედრაზე ასევე ყურადღება გამახვილდა ზუგდიდის მუნიციპალიტეტში „უფასო სასადილოს“ პროგრამის მიმდინარეობაზეც. „ მიუხედავად არასამთავრობო ორგანიზაციების არაერთი მოწოდებისა და კანონის მკაცრად გაწერილი რეგულაციებისა ინფორმაციას საკრებულოს მორიგი სხდომის შესახებ ზუგდდის მუნიციპალიტეტის საკრებულო არ ასაჯაროებს, ასევე არ ქვეყნდება დეტალური ინფორმაცია სხდომაზე განსახილველ საკითხებზე,“ ნათქვამია ანგარიშში. ანგარიშში ყურადღება გამახვილებულია მიმდინარე წლის 1 მაისის საკრებულოს სხდომაზე რომლის შესახებ ინფორმაცია მხოლოდ იმავე დღეს გამოქვეყნდა. აღინიშნულთან დაკავშირებით „სამოქალაქო მონიტორინგის და კვლევების ცენტის“ მიერ გაკეთებულ მიმართვას საკრებულოს საზოგადოებასთან და მედიასთან ურთიერთობის განყოფილების ხელმძღვანელმა თამარ შონიამ უპასუხა, რომ სხდომების გამართვის დაგეგმვა ხშირად სპონტანურად ხდება, ამიტომ ინფორმაციის განთავსება ვებ-გვერდზე 5 დღით ადრე შეუძლებელია. „თუ ამ ლოგიკით ვიხელმძღვანელებთ, 2013 წელს ჩატარებული ყველა სხდომა რიგგარეშედ არის მოწვეული, რაც შორს დგას რეალობისგან. თამარ შონია საფუძველს მოკლებული არგუმენტით შეეცადა საკრებულოს მხრიდან კანონის დარღვევის ფაქტის გამართლებას“, - აღნიშნა „სამოქალაქო მონიტორინგის და კვლევების ცენტრის“ გამგეობის თავმჯდომარე ნუგზარ გაბელიამ დემოკრატიული ჩართულობის ზუგდიდის ოფისში გამართული ანგარიშის წარდგენისას. „სამოქალაქო მონიტორინგის და კვლევების ცენტრის“ მიერ მომზადებულ ანგარიშში აღინიშნა, რომ ზუგდიდის მუნიციპალიტეტის საკრებულოდან საჯარო წესით ინფორმაციის მიღებაც გარკვეულ პრობლემებთან არის დაკავშირებული, თვითმმართველმა ორგანომ ორგანიზაციის მიერ გაგზავნილი წერილების მხოლოდ მცირე ნაწილს გასცა პასუხი. ასევე აღსანიშნავია, რომ მნიშვნელოვანი საკითხები გატანა საკრებულოს სხდომაზე წინასწარი განხილვებისა და დისკუსიის გარეშე ხდება. ანგარიშში მაგალითად მოყვანილია მერაბ კოსტავას ბიუსტის ქალაქში განთავსების საკითხი.რამდენიმე ასეული ხელმოწერის საფუძველზე სკულპტურისთვის ცენტრალური ბულვარის ტერიტორია შეირჩა, თუმცა 15 მაისს გამართულ საკრებულოს სხდომაზე ცნობილი გახდა, რომ მისი დადგმა სასამართლოს შენობის წინ, დადიანების სასახლის უკანა მხარეს არსებულ სკვერში გადაწყდა. „სამოქალაქო მონიტორინგისა და კვლევების ცენტრი“ მოუწოდებს საკრებულოს გაითვალისწინოს შეთავაზებული რეკომენდაიები. „ცხადია, რომ ნათლად დგას გადაუდებელი აუცილებლობა თვითმმართველობის სისტემაში სიღრმისეული რეფორმების განხორციელებისა, ახალ ადმინისტრაციულ/ტერიტორიულ მოწყობასთან ერთად რეფორმამ უნდა უზრუნველყოს თვითმმართველობის ორგანოების კვალიფიციური და კომპეტენტური კადრებით დაკომპლექტება. ასვევ გასატარებელია ფართო საგანმამანთლებლო ღონისძიებები, რათა მოქალაქეებიც გაერკვნენ თვითმმართველობის მინიმალურ პრინციპებში.“-ნათქვამია განცხადებაში. „სამოქალაქო მონიტორინგისა და კვლევების ცენტრი“ საჭიროებებიდან გამომდინარე თვითმმართველობის საკითხებზე საინფორმაციო კამპანიას იწყებს, რომლის ფარგლებშიც ზუგდიდის მუნიციპალიტეტის სოფლების მოსახლეობასთან ინფორმაციული ხასიათის შეხვედრები გაიმართება.