სენაკის მუნიციპალიტეტის საკრებულოს თავმჯდომარის მურად შამათავას თანამდებობიდან გადაყენების მოთხოვნით სენაკის საკრებულოში, 18 დეპუტატის ხელმოწერით, განცხადება შევიდა. დეპუტატები რიგგარეშე სხდომის ჩატარებას 14 ივნისს მოითხოვენ, სადაც საკრებულოს თავმჯდომარის გადაყენებას საკითხს დააყენებენ. სენაკის საკრებულოს სულ 23 დეპუტატი ჰყავს. სენაკის საკრებულოს, ფრაქცია „იბერია-მართლმადიდებლური საქართველოსთვის“ თავმჯდომარე მერაბ გეგელია, რომელიც რიგგარეშე სხდომაზე თავმჯდომარის გადაყენების საკითხის, სავარაუდოდ, მომხსენებელი იქნება, მედიასთან კომენტარის გაკეთება არ სურს. „ამ თემაზე ტელეფონით  ნამდვილად არ მსურს საუბარი. თქვენ შეგიძლიათ მობრძანდეთ საკრებულოში და აქ გეტყვიან ყველაფერს. მე არ გიპასუხებთ,“ - განუცხადა რადიო "ათინათს“ მერაბ გეგელიამ. როგორც რადიო „ათინათთან“ საუბარში, სენაკის საკრებულოს აპარატის უფროსმა კობა ბარამიამ განაცხადა, საკრებულოს თავმჯდომარეს დეპუტატთა უმრავლესობა უნდობლობას უცხადებს. "დეპუტატებს მოთხოვნა მოტივირებული და ჩამოყალიბებული აქვთ. ცნობა თითქმის სამ გვერდიანია, სადაც აღნიშნულია, რომ საკრებულოს თავმჯდომარე საქმისადმი გულგრილია, არაკოლიგიალური და არაკეთილსინდისიერია,“-  აცხადებს კობა ბარამია. მისივე განმარტებით, საკრებულოს თავმჯდომარე მურად შამათავა შვებულებაში, მისი გადაყენების  შესახებ ცნობის შემოსვლისთანავე, გავიდა. რადიო „ათინათმა“ სენაკის საკრებულოს თავმჯდომარე, მურად შამათავასთან დაკავშირება ვერ შეძლო. ცნობისთვის, საკრებულოს თავმჯდომარე  მურად შამათავა, საპარლამენტო არჩევნების შემდეგ, სენაკის საკრებულომ ხმათა უმრავლესობით აირჩია. ის სენაკის საკრებულოში კოალიცია  „ქართულ ოცნებას“ წარმოადგენდა.