სამეგრელო-ზემო სვანეთის მხარის სახალხო-დემოკრატიული მოძრაობის შტაბმა დღეს გამართულ  ბრიფინგზე,  სამეგრელოში კერძოდ ზუგდიდში, შს სამინისტროს მიერ  აღმოჩენილ სამალავებზე, წამებისა და არაადამიანური მოპყრობის ვიდეოფირებთან დაკავშირებით  საკუთარი  პოზიცია დააფიქსირა.  მოძრაობის  ხელმძღვანელი ვახუშტი ფარცვანია მომხდარ ფაქტს სამარცხვინოს უწოდებს და დასძენს რომ - „მხილებული დამნაშავეები მკაცრად უნდა იქნენ დასჯილნი. ყველაფერი ეს მოექცეს მხოლოდ ქვეყნის სამართლებლივ  ჩარჩოში, ერთხელ და სამუდამოდ   შეწყდეს ქართული თვითმყოფადობის შელახვა და ქვეყნის საშინაო საქმეების გამოჭენება საერთაშორისო არენაზე“ - განაცხადა ვახუშტი ფარცვანიამ. ვახუშტი ფარცვანია   ბრიფინგზე,  ასევე  გამოეხმაურა პრემიერ-მინისტრ  ბიძინა ივანიშვილის  პოლიტიკიდან წასვლის თაობაზე გაკეთებულ განცხადებას. ფარცვანია მიესალმება პრემიერ მინისტრის ამ გადაწყვეტილებას და მიაჩნია რომ - „ სწორედ ხალხმა უნდა აკონტროლოს ნებისმიერი მთავრობა და მხოლოდ საზოგადოება უნდაიყოს პოლიტიკის დამკვეთი და არა პირიქით“.