ზუგდიდში ყინულის სახლის მშენებლობა, 2 წლიანი პაუზის შემდეგ, უახლოეს თვეებში დასრულდება. ყინულის სახლის მშენებლობისთვის საჭირო 2 მილიონ 790 ათასი ლარი რეგიონული განვითარების ფონდიდან გამოიყო. სამშენებლო სამუშაოებს კი კომპანია „ბრაით ლაითი“ შეასრულებს. ამის შესახებ რადიო „ათინათს“ გამგებლის მოადგილის მოვალეობის შემსრულებელმა გიორგი თოდუამ განუცხადა. „თუ რაიმე ხელისშემშლელი გარემოპირობები არ შეიქმნა და მშენებლობა გეგმის მიხედვით განხორციელდა, ზუგდიდს ყინულის სახლი უახლოეს თვეებში ექნება“, - აცხადებს გიორგი თოდუა. მისივე განმარტებით, უკვე არსებობს მთავრობის განკარგულება, რომლის საფუძველზე სამშენებლო კომპანიას, ყინულის სახლის მშენებლობის პირველი ეტაპისთვის, 2 მილიონ 290 ათასი ლარი ჩაერიცხება. „როგორც ცნობილია, ზუგდიდის ყინაულის სახლი იქნება საერთაშორისო სტანდარტების შესაბამისი“, - აღნიშნა რადიო „ათინათთან“ საუბარში გიორგი თოდუამ. ზუგდიდის ყინულის მოედნის მშენებლობა იმავე ტერიტორიაზე ხორციელდება, სადაც მოედანი ადრე ფუნქციონირებდა. ყინულის საციგურაო მოედანი ადრინდელზე ორჯერ მეტი მოცულობის იქნება. ცნობისთვის, ზუგდიდში ყინულის სახლი, რომელიც პრეზიდენტი მიხეილ სააკაშვილის ინიციატივით 2007 წელს აშენდა, დაახლოებით 1,5 მლნ ლარი დაიხარჯა. ზუგდიდის ყინულის მოედნის დემონტაჟი, სადაც 600-მდე ბავშვი სწავლობდა, 2011 წელს მოხდა. მაშინ ზუგდიდის გამგეობაში აღნიშნავდნენ, რომ საერთაშორისო სტანდარტების და ორჯერ უფრო დიდი ყინულის სახლი უახლოეს მომავალში აშენდებოდა. ზუგდიდში, ყინულის სახლის მოსწავლეებმა და მათმა მშობლებმა, ყინულის მოედნის მშენებლობის დაწყების მოთხხოვნით, საპროტესტო აქცია რამდენჯერმე გამართეს.