საავტორო უფლებით დაცული ობიექტით ლეგალური სარგებლობისთვის რეგიონულ დონეზე ინფორმირებულობის ამაღლებას ისახავდა მიზნად დემოკრატიული ჩართულობის ცენტრში გამართული შეხვედრა, რომელიც  საქართველოს საავტორო უფლებათა ასოციაციის  თავმჯდომარემ  გამართა. შეხვედრაზე საავტორო და მომიჯნავე უფლებებს შორის განსხვავებაზე დეტალურად ისაუბრეს. საავტორო უფლების დარღვევის შემთხვევაში დამრღვევი მიღებული მოგების ათმაგი რაოდენობით ჯარიმდება. ასოციაცია თანამშრომლობს 150 ქვეყნის საავტორო უფლებებზე მომუშავე ორგანიზაციებთან და არეგულირებს საავტორო უფლებას არა მხოლოდ ეროვნულ პროდუქტზე, არამედ ქართულ ბაზარზე არსებულ უცხოურ პროდუქტებზეც, რომელთა პროცენტული რაოდენობა 75% –ს აღწევს. საქართველოს საავტორო უფლებათა ასოციაცია ერთადერთი, სახელმწიფოს მიერ დელეგირებული ორგანიზაციაა საქართველოში, რომელიც ამ მიმართულებით მუშაობს. ის 1999 წელს დაფუძნდა და  საქართველოს იუსტიციის სამინისტროს მიერ  ქონებრივი უფლებების კოლექტიურ საფუძველზე მმართველი ორგანიზაციის სპეციალური სტატუსით სარგებლობს. ამჯერად ორგანიზაცია საავტორო უფლებების მხრივ ინფორმირებულობის რეგიონულ დონეზე ამაღლების პროგრამას ანხორციელებს. შეხვედრა დადებითად შეაფასა სტუდია მუსიკალურ ქორეოგრაფიულ ცენტრ “ოდიშის“ დირექტორმა ნინო მამფორიამ – "ბედნიერი ვარ, რომ დღეს ზუგდიდს ეწვია ეს ასოციაცია, ბევრი შეკითხვა მქონდა და ამომწურავი პასუხები მივიღე“. ასოციაციის თავმჯდომარემ გიგა კობალაძემ რადიო „ათინათთან“ საუბრისას განაცხადა, რომ მათი ძირითადი მიზანი ახალი ხელოვანი ადამიანების აღმოჩენა, მათი ასოციაციაში გაწევრიანება და რეგიონის დონეზე ლიცენზირებულობის გაზრდაა.