"ახდა რუსული ოცნება, გუნავა ციხეშია",  "თავისუფლება გმირებს". მსგავსი შინაარსის ლოზუნგებით დღეს ზუგდიდში თენგიზ გუნავას მხარდამჭერი აქცია გაიმართა. რამდენიმე ათეულმა პიროვნებამ სამეგრელო-ზემო სვანეთის გუბერნატორის დაკავება სამხარეო ადმინისტრაციის შენობასთან მდუმარე აქციით გააპროტესტა. აქციის ორგანიზატორმა, სამეგრელოს ახალგაზრდული საინიციატივო ჯგუფის ლიდერმა ანი წითლიძემ მედიასთან საუბარში აღნიშნა, რომ გუშინ საქართველოს პრორუსულმა ხელისუფლებამ გუნავას განაჩენი ლანგარზე მიართვა პუტინის რუსეთს. „ნურავის ექნება ილუზია, რომ გუნავას დაკავებით სამეგრელოში ანტიოკუპაციური მოძრაობა შეწყდება-არც ერთი ნაბიჯი უკან ჩვენს უკან საქართველოა“,-აღნიშნა ანი წითლიძემ. „ვაპროტეტებ გუნავას დაკავებას, ქვეყანაში სადაც გმირებს იჭერენ, ქურდებს და გამაუპატიურებლებს კი გარეთ უშვებენ“,- განაცხადა აქციის ერთ-ერთმა მონაწილემ ბაჩუკი ქვარცხლიამ. აქციაზე თვითმმართველ ქალაქ ფოთის საკრებულოს წევრი დარეჯან ცხვიტარიაც იმყოფებოდა, რომელმაც მედიასთან საუბარში განმარტა, რომ გუნავა პოლიტიკური ნიშნით არის დაკავებული. „საქართველოში ყველა იმ ადამიანს აპატიმრებენ, ვინც ივანიშვილს არ დაუჩოქა", - აღნიშნა ცხვიტარიამ. თენგიზ გუნავას მხარდასაჭერი აქცია ზუგდიდში მშვიდობიანად დასრულდა. გუნავას დაკავება დღეს საქართველოს რამდენიმე რეგიონში მშვიდობიანი აქციით გააპროტესტეს. შეგახსენებთ, რომ სამეგრელო-ზემო სვანეთის გუბერნატორი გუშინ სასამართლო პროცსზე იქნა დაკავებული. მას 4 წლიანი პატიმრობა შეეფარდა. თენგიზ გუნავა დამნაშავედ ცნეს ბრალდების სამი ეპიზოდიდან ორში – ბენზინის ტალონებისა და სახელმწიფო ქონების მითვისებაში.