საქართველოს სპორტისა და ახალგაზრდობის მინისტრი ლევან ყიფიანი ზუგდიდში, კინოთეატრ „ატრიუმში“ საფეხბურთო კლუბ „ზუგდიდის“ ხელმძღვანელებს და გულშემატკივრებს შეხვდა. ფეხბურთის გულკშემატკივრებმა მინისტრს კლუბ „ზუგდიდის" გადარჩენა სთხოვეს. მათი თქმით, თუ კლუბმა ფინანსური დახმარება არ მიიღო, გუნდი რამდენიმე დღეში დაიშლება. ფეხბურთის ქომაგებმა მინისტრს ასევე, ზუგდიდში სტადიონის არ არსებობის შესახებ ესაუბრნენ. ზუგდიდის ფეხბურთის ფედერაციის პრეზიდენტის როლანდ მაქაცარიას განმარტებით, კლუბმა მიმდინარე სეზონში თამაში, რომ შეძლოს მინიმუმ 500 ათასი ლარი სჭირდება. „დაუშვათ ადგილობრივ ბიუჯეტს არა აქვს თანხები, ცენტრალუერი ხელისუფლება, ხომ უნდა დაეხმაროს? სხვა გვარად რა ხელისუფლება ხარ?! გარანტად მინისტრი უნდა დადგეს, რომ გუნდი ჩემპიონატიდან არ გავარდეს“, - აცხადებს როლანდ მაქაცარია. სპორტისა და ახალგაზრდობის მინისტრმა გულშემატკივრებს განუცხადა, რომ ძალ-ღონეს არ დაიშურებს კლუბ "ზუგდიდის" გუნდის შენარჩუნებისთვის. თუმცა მისივე განმარტებით, თანხების აკუმლირებისთვის დროა საჭირო , რადგან ყველა პროცესი კანონის ფარგლებში უნდა მოექცეს. მინისტრმა გულშემატკივრებს განუცხადა, რომ საფეხბურთო კლუბ „ზუგდიდის“ ბიუჯეტი, მომდვნო წლებში, 1,5 მილიონ ლარამდე გაიზრდება. მინისტრის ამ განცხადებაზე ზუგდიდის ფეხბურთის ფედერაციის ხელმძღვანელებმა და გულშემატკივრებმა აღნიშნეს, რომ გუნდს თუ სასწრაფოდ არ გაეწია ფინანსური დახმარება, ის ერთ კვირაში დაიშლება და აღდგენას წლები დასჭირდება. მინისტრისა და ფეხბურთის ქომაგების შეხევრდას, ასევე ესწრებოდნენ ზუგდიდის მუნიციპალიტეტის გამგებლის მოვალეობის დროებით შემსრულებელი ედიშერ თოლორაია და მოადგილის მოვალეობის შემსრულებლები. ედიშერ თოლორაიამ ფეხბურთის გულშემატკივრებს უთხრა, რომ კომბინატში სტადიონის მშენებლობა გადაწყვეტილია და ის უახლოეს პერიოდში აშენდება. მისივე განმარტებით, მან ეს დაპირება რეგიონული განვითარებისა და ინფრასტრუქტურის მინიტრის, დავით ნარმანიასგან მიიღო. ზუგდიდის ფეხბურთის გულშემატკივრებმა მინისტრთან შეხვედრაზე  განაცხადეს, რომ თუ საფეხბურთო კლუბი „ზუგდიდი“ დაიშლება და საფეხბურთო სტადიონი არ აშენდება, საპროტესტო აქციებს გამართავენ.