საქართველოს შრომის, ჯანმრთელობისა და სოციალური დაცვის მინისტრი დავით სერგეენკო დღეს, 24 ივლისს ზუგდიდს ეწვია. ჯანდაცვის მინისტრმა ზუგდიდში გამგეობის მიერ საავადმყოფოს ასაშენებლად შეთავაზებული ტერიტორიები მოინახულა. მინისტრის განცხადებით კლინიკის ასაშენებლად შეთავაზებული ყველა ადგილი სამინისტროს მოთხოვნებს აკმაყოფილებს, თუმცა ამ ეტაპზე გადაწყვეტილების მიღება ვერ ხერხდება, რადგან პროცესში ტოპოგრაფები და გეოლოგები უნდა ჩაერთონ. მინისტრის თქმით კლინიკა, რომელიც ზუგდიდში აშენდება არა მხოლოდ ადგილობრივი, არამედ აფახაზეთის მოსახლეობისთვისაც იქნება განკუთვნილი. „ეს არ იქნება მოხლოდ სამკურნალო დაწესებულება, აქ იქნება ასევე მძლავრი სასწავლო დაწესებულება, რომლის ბაზაზე იგეგმება საერთო საცხოვრებლის გახსნა, რომლითაც რეზიდენტები და პაციენტთა ახლობლები ისარგებლებენ“. -განაცხადა მედიასთან საუბარში ჯანდაცვის მინისტრმა. კითხვაზე, იქნება თუ არა კლინიკაში უფასო სამედიცინო მომსახურება, სერგენკომ განაცხადა, რომ 28 თებერვლიდან საქართველოს მოსახლეობის 100% -ს ჯანდაცვითი დახმარება აქვს, ამიტომ ქვეყანაში უფასო საავადმყოფოს საჭიროება არ არის. წინასწარი ვარაუდით საავადმყოფო, რომელიც ზუგდიდსი უნდა აშენდეს 120-160 საწოლზე იქნება გათვლილი და მისი მშენებლობისთვის სახელმწიფო ბიუჯეტიდან 20 მილიონი ლარი გამოიყოფა. მშენებლობა სავარაუდოდ მომავალი წლიდან დაიწყება და წელიწადნახევარში დასრულდება.