კოალიცია „ქართული ოცნების“ მარტვილის ორგანიზაციის მიერ მარტვილში დაგეგმილი საპროტესტო აქცია, რომელიც დავით საგანელიძის სააჩევნო სტრატეგიის წინააღმდეგ იყო დაგეგმილი, აღარ გაიმართება. ამის შესახებ რადიო „ათინათს“ კოალიციის ერთ-ერთმა წევრმა ზურაბ ბიგვავამ განუცხადა. მისივე განმარტებით, აქციის ნაცვლად კოალიციის წევრები პრესკონფერენციას გამართავენ. „დავით საგანელიძემ რამდენიმე რაიონში საარჩევნო შტაბში მხედრიონელები გაუშვა. სამეგრელოში გამოუშვა ვალერი კვარაცხელია, რომელიც იყო შევარდნაძის მეგობარი და ნაციონალური მოძრაობის წევრი 1 ოქტომბრამდე“ , - აცხადებს რადიო "ათინათთან" საუბარში „ქართული ოცნების“ მარტვილის ორგანიზაციის წევრი ზურაბ ბიგვავა . მისივე განმარტებით, საგანელიძეს საარჩევნო შტაბებში „მხედრიონელების“ გარდა ყოფილი „ნაციონალები“ და „მემარჯვენეები“ მოჰყავს. „საგანელიძის ეს პოლიტიკა „ქართულ ოცნებას“ დამარცხებამდე მიიყვანს, მერე კი ყველაფერი გვიანი იქნება“, - აცხადებს ზურაბ ბიგვავა. რადიო „ათინათმა“დავით საგანელიძესთან დაკავშირება სცადა თუმცა, ის „ათინათის“ სატელეფონო ზარებს არ პასუხობს.