სამეგრელო-ზემო სვანეთის გუბერნატორის თენგიზ გუნავას განცხადებით, მარტვილის მუნიციპალიტეტის საკრებულოს წევრებზე საფინანსო პოლიცია, გამგებლის გადაყენების მოთხოვნით, ზეწოლას ახდენს. მისივე განმარტებით საფინანსო პოლიციაში საკრებულოს 7 წევრი დაიბარეს. გუნავამ ამის შესახებ, მისი გათავისუფლებიდან პირველ სამუშაო დღესთან დაკავშირებულ ბრიფინგზე ისაუბრა. მარტვილის მუნიციპალიტეტის საკრებულოს წევრი ელდარ ჯოჯუა, რომელიც საფინანსო პოლიციაში დაბარებულებს შორის ერთ-ერთი იყო, აცხადებს, რომ მათი პოლიციაში დაბარება მიზანშეწონილი არ იყო. „საფინასო პოლიციაში გვითხრეს, გამგებელს ურჩიეთ წავიდესო. მე და ჩემი კოლეგები პოლიციაში დაბარებით გაოგნებულები ვიყავით.როგორ არის ეს მიზანშწონილი, მიმაჩნია რომ ეს ზეწოლის ფაქტია“, - უთხრა რადიო „ათინათს“ ელდარ ჯოჯუამ. ჯოჯუას განცხადებით, მარტვილის საკრებულო გამგებელ, მამუკა დანელიას გადაყენებას არ გეგმავს, რადგან საფინანსო პოლიციას მარტვილის გამგეობაში, რომელიც საპარლამენტო არჩევნების შემდეგ დოკუმენტების შემოწმების მიზნით იყო შესული, დარღვევები არ აღმოუჩენიათ.