ნოქალაქევში კოალიცია "ქართული ოცნების" პრეზიდენტობის კანდიდატის, გიორგი მარგველაშვილის წარდგენის შემდეგ მცირე ინციდენტი მოხდა. შელაპარაკება ადგილზე , ქალთა კავშირის "ქალები მშვიდობისა და სამართლიანობისათვის" წევრს, ინგა ქარდავასა და სამეგრელოს ყოფილ გუბერნატორ და ამჟამად პარლამენტის წევრ, გურამ მისაბიშვილს  შორის მოხდა. ქალთა კავშირის წევრმა ყოფილ გუბერნატორს თავისი "ნაციონალური" წარსული შეახსენა და შეურაცხმყოფელი ფრაზებით მიმართა. ქარდავას განცხადებით, მისაბიშვილის გუბერნატორობის პერიოდში "ქართული ოცნების" სენაკის შტაბის წარმომადგენლებს  მუდმივად უშლიდნენ ხელს მუშაობაში და მათზე ზეწილას ახორციელებდნენ. "ეს ის მისაბიშვილია, რომელიც 9 წლის განმავლობაში, სამეგრელოში სააკაშვილის დანაშაულებრივი რეჟიმის დავალებებს ასრულებდა. მისი აქ ყოფნა დღეს ამაზრზენია. მე ის ინგა ქარდავა ვარ, რომლის ზურგზეც გადავიდა "ქართული ოცნების" გამარჯვება სენაკში, რომელსაც ეს ვაჟბატონი, ეს კრიმინალი მისაბიშვილი უშლიდა ხელს", - განაცხადა ქარდავამ. მისაბიშვილის განცხადებით კი, ის გიორგი მარგველაშვილის მხარდამჭერია, ამჟამად პარლამენტში დამოუკიდებელი დებუტატის სტატუსით სარგებლობს და ქარდავას განცხადებებზე კომენტარის გაკეთება არ სურს. მისივე განცხადებით, ის "ქართულ ოცნებაში" გაწევრიანებას არ აპირებს, თუმცა მის მხარდამჭერად დარჩება. "მე ვარ ცენტრისტი, როგორც მაჟორიტარი დეპუტატი, მაგრამ ამ შემთხევაში ხელისუფლების მხარდამჭერი ვარ ამ კანდიდატურასთან დაკავშირებით", - დასძინა მან. აღნიშნულთან დაკავშირებით კომენტარი "ქალები მშვიდობისა და სამართლიანობისათვის" წევრმა ლალი ანთიამაც გააკეთა და აღნიშნა, რომ თუ მარგველაშვილს არჩევნების პერიოდში მისაბიშვილის „მსგავსი“ პიროვნებები დაუდგებიან გვერდში მაშინ ის ვერ გაიმარჯვებს. ინციდენტის განმუხტვა მარგველაშვილის შტაბის ხელმძღვანელის დავით საგანელიძის ჩარევის შემდეგ მოხერხდა.