ზუგდიდის მუნიციპალიტეტის მასშტაბით  საბავშვო ბაღის გარეშე წელს 550 ბავშვი დარჩა. ამის შესახებ რადიო „ათინათს“ ზუგდიდის გამგეობაში განუცხადეს. გამგებლის მოადგილის მოვალეობის შემსრულებლი მერაბ ქვარაია ზემოაღნიშნულის მიზეზად საბავშვო ბაღებში დევნილების ჩასახლებით გამოწვეული ფართის უქონლობას ასახელებს. ქვარაია იმედოვნებს რომ ეს პრობლემა ეტაპობრივად მოგვარდება. „სამწუხარო რეალობის წინაშე ავღმოვჩნდით, თუმცა ეს პრობლემა მოგვარებადია. როგორც კი დევნილები მათთვის განკუთვნილ საცხოვრებელ სახლებში განთავსდებიან, საბავშვო ბაღებში დაიწყება სარემონტო სამუშაოები“.- აცხადებს მერაბ ქვარაია და დასძენს რომ  წელს, ბავშვთა მოზღვავებული კონტიგენტი, შესაძლებელია უფასო ბაღებით იყოს განპირობებული. ზუგდიდის სკოლამდელი სააღმზრდელო დაწესებულებათა ცენტრის დირექტორი, მარინა კვიკვინია აცხადებს, რომ  მომავალი წლისთვის ბაღის გარეშე არც ერთი ბავშვი არ დარჩება. „წინა წლებთან შედარებით,  წელს საბავშვო ბაღებში კვება, ორჯერადის ნაცვლად, სამჯერადი გახდება და ამისთვის სახელმწიფო ბიუჯეტიდან 144 ათასი ლარია გამოყოფილი,“ - ამბობს მარინა კვიკვინია. მისივე განცხადებით,  ცაიშის, დიდინეძის, ნაცატუსა და ქალაქის მე-16 საბავშვო ბაღებში კაპიტალური რემონტი უახლოეს დღეებში  დასრულდება.  ასევე დაგეგმილია ნარაზენის, ზედაეწერის,  რიყის, ოირემესა და  ქალაქის მე-8-ე, მე-9-ე, მე12-ე და მე-16 ბაღებში აღდგენითი სამუშაოების ჩატარება. ცნობისთვის, ზუგდიდის მუნიციპალიტეტის ბიუჯეტიდან სკოლამდელი სააღმზრდელო დაწესებულებების ფუნქციონირებისთვის 1 მილიონ 600 ათასი ლარია გამოყოფილი.