ზუგდიდის მუნიციპალიტეტის სოფელ შამგონის სკოლა-ინტერნატის ყოფილი თანამშრომლები და მშობლები სკოლის აღდგენას ითხოვენ. ისინი ამ მოთხოვნით დღეს სკოლის ეზოში შეიკრიბნენ. სკოლის ყოფილი თანამშრომლების განმარტებით, მათ ეკონომიკის სამინისტროს ბალანსზე არსებული შენობის საპატრიარქოსთვის გადაცემა სურთ. ამ მოთხოვნით სკოლის თანამშრომლები რამდენიმე დღეში ეკონომიკის სამინისტროს წერილის გაგზავნას გეგმავენ. შამგონის სკოლა-ინტერნატი 2012 ივლისში დაიხურა და მას შემდეგ სკოლის შენობას ყოფილი თანამშრომლები იცავენ. ბავშვთა სახლის ყოფილი დირექტორი როინ შენგელია ამბობს, რომ დაწესებულების დახურვის შემდეგ, მოსწავლეთა ნაწილი ჩხოროწყუსა და წალენჯიხის თანამედროვე ტიპის ბავშვთა სახლებში გადანაწილდა, ნაწილი კი მშობლებს დაუბრუნდა. ხოლო, რაც შეეხება სკოლის მოძრავ ქონებას, მისვე თქმით, სენაკის ბავშვთა სახლსა და ზუგდიდის გამგეობას შორის განაწილდა. „სამწუხაროდ ეკონომიკის სამინისტროსგან გამოხმაურება ამ დრომდე არ ყოფილა. დაწესებულება უკვე სავალალო მდგომარეობაშია და მიხედვას საჭიროებს“, - აცხადებს ბავშვთა სახლის ყოფილი დირექტორი როინ შენგელია. იგი აქვე განმარტავს, რომ საპატრიაროს აქვს პროექტი, რომლის თანახმად შამგონის ყოფილ ბავშვთა სახლის შენობის ბაზაზე შესაძლოა სახელოვნებო სკოლა-პანსიონი გაიხსნას. ზემოაღნიშნული საკითხით დაინტერესებული ირინა ჭითანავა ამბობს, რომ საპატრიარქომ 2012 წლის დეკემბერში, სკოლის შენობის გადმოცემის მოთხოვნით, ეკონომიკისა და მდგრადი განვითარების სამინისტროს წერილით მიმართა, თუმცა მისვე განმარტებით პასუხი ჭიანურდება. ჭითანავა დასძენს, რომ სკოლის დაფინსების საკითხიც მოგვარებადია, რადგან ბიზნესმენებისგან და სხვადასხვა არასამთავრობო ორგანიზაცებისგან მხარდაჭერას ელიან. სკოლა-ინტერნატის ყოფილი პედაგოგი მარინა ჟვანია განმარტავს, რომ სკოლით 4 სოფლის მოსახლეობა სარგებლობდა და ადგილობრივებისთვის მნიშვნელოვან ფუნქციას ასრულებდა. მისვე განმარტებით, მათ უკვე შეაგროვეს 300-მდე ხელმოწერა, რომელიც საქართველოს პრემიერ მინისტრს ბიძინა ივანიშვილს და პარლამენტს გაუგზავნეს. ხელმოწერები სკოლის ეზოში დღესაც შეგროვდა. აფხაზეთიდან დევნილი ცისანა გერგედავა ხელისუფლებას სკოლის ბედით დაინტერესებას სთხოვს და აცხადებს, რომ მისი ოჯახისთვის შამგონის სკოლა-ინტერნატი მოხერხებული, იყო, რადგან სოფელი აფხაზეთის ადმინისტრაციულ საზღვართან ახლოს მდებეარეობს. მისივე თქმით, მისი შვილები ახლა აბასთუმანის საჯარო სკოლაში სწავლობენ. „მე სამი შვილი მყავს და ჩვენთვის ეს სკოლა ძალიან მოხერხებული იყო. აქ ძალიან კარგი გარემო იყო ბავშვებისთვის. ჩემს შვილებს ამ სკოლის გარდა კარგი არაფერი უნახავს“, ამბობს ცისანა გერგედავა. ცნობისთვის, შამგონის ბავშვთა სახლი 1952 წელს დაარსდა. 1959-93 წლებში ფუნქციონირებდა , როგორც ზუგდიდის საშუალო სკოლა-ინტერნატი, 1993-96 წლებში კი როგორც ზუგდიდის ობოლთა და მზრუნველობამოკლებულ ბავშვთა სახლი. 2009 წელს ჯანდაცვის სამინიტროს გადაეცა და 2012 წლამდე ზუგდიდის ბავშვთა სახლის სახელით იყო ცნობილი.