ჰოლივუდის ცნობილი მსახიობი ჯეკ ნიკოლსონი მეხსიერების გუარესებასთან დაკავშირებით კინოკარიერას ასრულებს. პორტალ radaronline–ის ინფორმაციით, 76 წლის ნიკოლსონის გადაწყვეტილება დაკავშირებულია იმასთან, რომ მსახიობი მეხსიერებას უჩივის და თავისი როლების გრძელი ტექსტების დამახსოვრება უჭირს. ამრიგად, 2010 წელს გადაღებული ფილმი „ვინ იცის“ (How Do You Know), შესაძლოა მსახიობის კარიერაში ბოლო ნამუშევარი გახდეს. თუმცა, თავად ჯეკ ნიკოლსონს კარიერის დასრულებასთან დაკავშირებით არანაირი განცხადებები ჯერჯერობით არ გაუკეთებია. ჯეკ ნიკოლსონი ერთ–ერთი უდიდესი მსახიობია თანამედროვე კინოს ისტორიაში. ის სამჯერ გახდა „ოსკაროსანი“ და 12–ჯერ იყო ნომინირებული ამერიკის კინოაკადემიის ჯილდოზე. მას ასევე მიღებული აქვს 7 ოქროს გლობუსი და კენედის ცენტრის პრემია 2001 წელს. 1994 წელს, ის ერთ–ერთი ყველაზე ახალგაზრდა მსახიობი იყო, ვინც კინემატოგრაფიის ამერიკულმა ინსტიტუტმა ცხოვრებისეული მიღწევებისთვის დააჯილდოვა. ჯეკ ნიკოლსონმა მონაწილეობა მიიღო ცნობილ კინოფილმებში: „ხუთი იოლი პიესა“, „ჩინური კვარტალი“, „ვიღაცამ გუგულის ბუდეს გადაუფრინა“,„ფოსტალიონი ყოველთვის ორჯერ რეკავს“, „წითლები“, „სინაზის ენა“,„ბეტმენი“, „რამდენიმე კარგი ბიჭი“, „ჰოფა“, „მგელი“, „უკეთესი არ არსებობს“,„შმიდტის შესახებ“, „სიყვარული წესების მიხედვით და მათ გარეშეც“ და„ორმაგი თამაში“.