საქართველოს მასშტაბით საჯარო სკოლებმა დღეს სახელმძღვანელოები მიიღეს. როგორც რადიო „ათინათს“ ზუგდიდის საგანმანათლებლო რესურსცენტრში განუცხადეს, ყველა საჯარო სკოლამ უკვე მიიღო სახელმძღვანელოები და სკოლები სასწავლო წლის დაწყებასისთვის, სრულ მზადყოფნაში არიან. „მოსწავლეებისთვის წიგნების გადაცემისთვის ერთადერთი პროცედურა რჩება და ის წიგნების მოვლა პატრონობას ეხება“, -ამბობენ ზუგდიდის განათლების რესურსცენტრში. აკ.წერეთლის სახელობის ნომერ პირველ საჯარო სკოლის მეცხრე კლასის მოსწავლე სალომე შონია მიღებული სახელმძღვანელოებით კმაყოფილია და ამბობს, რომ მისმა ოჯახმა განათლების სამინისტროს ამ გადაწყვეტილებით 300 ლარამდე ეკონომია გააკეთა. საქართველოს განათლებისა და მეცნიერების მინისტრის მოადგილის, ლია გიგაურის მტკიცებით, მეორადი სახელმძღვანელოების დარიგება რამდენიმე სკოლაში გახდა საჭირო. როგორც განათლების მინისტრის მოადგილე ლია გიგაური განმარტავს, სამინისტროს აქვს ბაზები, თუ რომელ სკოლაში რამდენი სახელმძღვანელოა საჭირო, თუმცა სკოლებში მოსწავლეთა მობილობის გამო, ზოგიერთ სკოლაში მეორადი სახელმძღვანელოების დარიგება გახდა საჭირო.