ზუგდიდში გუშინ, 11 სექტემბერს კახა მიქაიას სიტყვიერი შეურაცხყოფისთვის დაკავებულ ორ პირს სასამართლომ 100-100 ლარიანი ჯარიმის გადახდა დააკისრა. დაკავებულმა გოჩა ბუკიამ სასამართლოს განუცხადა, რომ "ხალხმა იცის თუ რატომ გავაკეთე ეს". მან ასევე სხდომაზე განაცხადა, რომ გუშინ ის ნასვამ მდგომარეობაში იმყოფებოდა და ინანიებს ჩადენილ საქციელს. "კახა მიქაიას სამრცხვინო საქციელი მთელმა საქართველომ იხილა. ჩემმა შვილმა მიქაიას ჰკითხა, რას აკეთებო, მან უთხრა გაზა უნდა გადავკეთოო. ამ დროს გოჩამ ესროლა სიგარეტის ნამწვი. შეაგინა? შესაგინებელი იყო, ის არის ნაძირალა, " უთხრა ჟურნალისტებს გოჩა ბუკიას დედამ, ტურფა გვილიამ. სასამართლოში დაკავებულების მხარდასაჭერად მისულები იყვნენ ზუგდიდის საკრებულოს თანამშრომლებიც. "გუშინ გოჩა ბუკიამ გააკეთა ის რაც უნდა გაეკეთებინა მთელ ზუგდიდის", -განაცხადა ზუგდიდის საკრებულოს აპარატის თანამშრომელმა ბათლომე შელიამ და დასძინა, რომ მას კანონი არ დაურღვევია და ის სასამართლოში შესვენების დროს მივიდა. ცნობისთვის, "დაიცავი საქართველოს" წევრ კახა მიქაიას გუშინ, "ნაცინალური მოძრაობის" პრეზიდენტობის კანდიდატის დავით ბაქრაძის ვიზიტთან დაკავშირებით გამართულ საპროტესტო აქციაზე, სიტყვიერი შეურაცხყოფა მიაყენეს.რა დროსაც პოლიციამ, წვრილმანი ხულიგნობის ბრალდებით ორი პირი, გოჩა ბუკია და ცოტნე ხურცილავა დააკავა.