თბილისში,  სასტუმრო "ქორთიარდ მარიოტთან"  საპროტესტო აქცია მიმდინარეობს , რომელსაც არასამთავრობო ორგანიზაცია და უფლებადამცველები "ხუდონჰესის" მშენებლობის საწინააღმდეგოდ მართავენ. "ხუდენჰესის" მშენებლობა დაუშვებელია, რადგან ის დამღუპველ კლიმატურ ცვლილებას გამოიწვევს და სვანეთში ბუნება და ისტორიული ადგილები განადგურდება. ამბობენ აქციის მონაწილეები. უფლებადამცველები პრემიერს მიმართავენ და სთხოვენ შეასრულოს დაპირება, რომელიც მან წინასაარჩევნოდ გასცა. მათი თქმით, პრემიერის დაპირება უმსხვილესი ჰიდროელექტროსადგურების მშენებლობის პროექტის შეჩერება იყო. აქციის მონაწილეების თქმით, ისინი ბრძოლას გააგრძელებენ, სვანეთში ჩავლენ და გვერდით იმ ადამიანებს დაუდგებიან, რომლებმაც დაიფიცეს, რომ ჰესი არ აშენდება. როგორც აქციაზე მყოფმა ლაშა ჩხარტიშვილმა განაცხადა, 26 სექტემბერს, ისინი მთავრობის კანცელარიასთან ფართომასშტაბიანი აქციის გამართვას აპირებენ, რომ პრემიერს ჰესის მშენებლობის შეჩერება კიდევ ერთხელ მოსთხოვონ. აქცია უკავშირდება სასტუმრო "ქორთიარდ მარიოტში" მიმდინარე ღონისძიებას, სადაც დღეს "ხუდონჰესის" მშენებლობის პროექტის საჯარო განხილვა მიმდინარეობს.