დღეს, ზუგდიდში ელექტროენერგიის აღდგენის მოთხოვნით ყოფილ პოლიტექნიკურ შენობაში შესახლებული დევნილები ლტოლვილთა და განსახლების სამეგრელო–ზემო სვანეთის სამმართველოში შეიჭრნენ. დევნილებს ელექტროენერგიის მიწოდება გუშინ შეუწყდათ. მათ აღნიშნული პრობლემის მოსაგვარებლად სამმართველოს უფროსთან ირაკლი ქოჩუასთან  მოითხოვეს შეხვედრა, მათივე განცხადებით ქოჩუამ მათ განუმარტა, რომ აღნიშული საკითხის მოგვარება მის კომპეტენციაში არ შედის. ირაკლი ქოჩუამ ჟურნალისტებთან კომენტარისგან თავი შეიკავა. ოკუპირებული ტერიტორიებიდან იძულებით გადაადგილებულ პირთა, განსახლების და ლტოლვილთა სამინისტროს დევნილთა დეპარტამენტში კი აცხადებენ, რომ აღნიშნული შენობა ეკონომიკის სამინისტროს ბალანსზე ირიცხება და დევნილთა მოთხოვნების დაკმაყოფილება მათ არ შეუძლიათ. თავის მხრივ, „ენერგო- პრო ჯორჯიაში“ აცხადებენ, რომ ობიექტი, სადაც ამჟამად დევნილები ცხოვრობენ, მათ ბაზაში როგორც კომპაქტური ჩასახლება, არ არის რეგისტრირებული. იმისთვის, რომ მათ ელექტროენერგია მიეწოდოთ და ენერგო კომპანიამ ობიექტი ბაზაში ჩასვას მესაკუთრის თანხმობაა საჭირო.