საქართველოს პრეზიდენტი მიხეილ სააკაშვილი ანაკლიაში რამდენიმე წუთით იმყოფებოდა. მან იქაურობა ჟურნალისტებთან და ადგილზე შეკრებილ ხალხთან გასაუბრების შემდეგ დატოვა. საპროტესტო აქციის მონაწილეებმა პრეზიდენტი სამეგრელოში აღმოჩენილ სამალავების სანახავად "დაპატიჟეს". აქციის მონაწილეების საპასუხოდ პრეზიდენტნმა განაცხადა, რომ "საქართველოში შევარდნაძის ეპოქა დაბრუნდა". „არ აქვს მნიშვნელობა, ვინ იქნება ქვეყნის სათავეში. ლაზიკის პორტი აუცილებლად უნდა აშენდეს და აშენდება“, - განაცხადა მიხეილ სააკაშვილმა. სამართალდამცველებმა "დაიცავი საქართველოს" ლიდერს, კახა მიქაიას პრეზიდენტთან მიახლოების საშუალება არ მისცეს. ცნობისთვის, ანაკლიაში, დილიდან მოძრაობა "დაიცავი საქართველოსა" და "ქალები მშვიდობისთვის" წარმომადგენლები, თანამოაზრეებთან ერთად, იმყოფებოდნენ. ისინი პრეზიდენტის ანაკლიაში ჩასვლას აპროტესტებდნენ. მიხეილ სააკაშვილთან შესახვედრად ასევე მისულები იყვნენ იპრეზიდენტის მხარდამჭერებიც. მათ შორის მცირე დაპირისპირებაც მოხდა. ადგილზე ასევე მობილიზებულები იყვნენ სამართალდამცავები. მოძრაობის წარმომადგენლები აცხადებდნენ, რომ სააკაშვილს სამეგრელოში ჩამოსვლის უფლება არ აქვს.