ჯანდაცვის სამინისტროს კონტროლისა და საზოგადოებრივი ჯანმრთელობის ეროვნული ცენტრი, მდინარეების ცხენისწყლისა და რიონის სანაპიროებთან მცხოვრებ მოსახლეობას , სიფრთხილისკენ მოუწოდებს. ცენტრის მიერ ფოთის ჯანდაცვის ცენტრსა და ფოთის მერიისთვის გაგზავნილ ოფიციალურ გაფრთხილებაში ნათქვამია, რომ მდინარე ცხენისწყლის კალაპოტში, დარიშხნის სამარხების ჩარეცხვა მოსახლეობის ჯანმრთელობისთვის საფრთხის შემცველია. "უკანასკნელი დღეების კოკისპირულმა წვიმებმა გამოიწვია მდინარე ცხენისწყლის ადიდება, რის შედეგადაც სოფელ ცინისა და ლაგურშაკის არსებული, გაუქმებული სამთო-ქიმიური ქარხნის ტერიტორიიდან ხდება დარიშხნის სამარხების ჩარეცხვა ცხენისწყლის კალაპოტში, რაც ამ წყლის მოხმარების შემთხვევაში, საფრთხეს უქმნის ცხენისწყლისა და რიონის მიმდებარე ტერიტორიაზე მცხოვრები მოსახლეობის ჯანმრთელობა. გთხოვთ, მიიღოთ ზომები მოსახლეობის გასაფრთხილებლად აღნიშნულ მდინარეებში თევზის დაჭერის, ბანაობისა და წყლის მოხმარების აკრძალვაზე. აქვე გაცნობებთ, რომ ადგილზე მუშაობს გარემოს დაცვის შესაბამისი სამსახური, რის შედეგებსაც გაცნობებთ დამატებით", - ნათქვამია ფოთის მერიისთვის გაგზავნილ წერილში.