სამეგრელო-ზემო სვანეთის მხარის "სახალხო მოძრაობის" ერთ-ერთი ლიდერი, ვახუშტი ფარცვანია ბიძინა ივანიშვილს თანამდებობის დატოვებისკენ მოუწოდებს. „გუშინ, თქვენსა და ჟურნალისტებს შორის გამართულმა შეხვედრამ ცხადყო, რომ ნამდვილად, საჩქაროდ უნდა დატოვოთ მთავრობის მეთაურის პოსტი. ეს თხოვნაა და ამით თქვენც მოიგებთ. მაგრამ კატეგორიული მოთხოვნაა, სანამ წახვალთ, წერტილი დაუსვათ უკვე თქვენი წყალობით საქართველოში კლასიკური ნიშნით ფეოდალიზმის დამკვიდრებას“, - განაცხადა დღეს, 3 ოქტომბერს საგანგებოდ გამართულ ბრიფინგზე ვახუშტი ფარცვანიამ. ფარცვანია პრემიერ-მინისტრს ასევე მოუწოდებს შეჩერდეს და შეწყვიტოს ქართველი ხალხის შეურაცხყოფა. „თქვენ საკუთარი თავი დაგვინიშნეთ პრემიერ-მინისტრად, ყველა მინისტრი მხოლოდ თქვენი მოთხოვნითა და მითითებით დაინიშნა. დეპუტატები თქვენ მოგვახვიეთ თავს, პრეზიდენტს თქვენ გვინიშნავთ და მხოლოდ ფორამლურად ატარებთ არჩევნებს“, -აცხადებს ფარცვანია. ამასთან, ვახუშტი ფარცვანია საზოგადოებას მოუწოდებს, დაიწყონ თავინთი რჩეული კანდიდატის წარმოჩენა.