პოლიციის დეპარტამენტის სამეგრელო-ზემო სვანეთის მთავარ სამმართველოს დღეს, 11 ოქტომბერს „შკოდას” მარკის, 20 ახალი ავტომობილი გადაეცა. ღონისძიებას შს მინისტრი ირაკლი ღარიბაშვილი და საპატრულო პოლიციის დეპარტამენტის ხელმძღვანელები ესწრებოდნენ. ირაკლი ღარიბაშვილის განცხადებით, დღეიდან საპატრულო პოლიცია კონფლიქტისპირა სოფლებშიც განახორციელებს პატრულირებას. „ჩვენს მიერ განხორციელბული და დაგეგმილი ღონისძიებები მოგვცემს საშუალებას უფრო ეფექტურად დავიცვათ წესრიგი და უსაფრთხოება მთელ რეგიონში, მათ შორის კონფლიქტისპირა სოფლებში“, - განაცხადა ირაკლი ღარიბაშვილმა. მისივე, თქმით მოქმედი ხელისუფლების პირობებში რეფორმირება და განახლება შეუქცევადი პროცესია. „ჩვენ უარი ვთქვით პოლიტიზირებულ მმართველობაზე ჩვენს სისტემაში, რითაც ქვეყანაში სიმშვიდე და თავისუფლება გავხადეთ რეალური და არა მოჩვენებითი“,- აღნიშნა მინისტრმა ღონისძიებაზე. შს მინისტრმა ირაკლი ღარიბაშვილმა საპატრულო პოლიციის თანამშრომლებს გაწეული ღვაწლისა და სიმტკიცისთვის მადლობა გადაუხადა. ამასთან, ღონისძიების დასრულების შემდეგ  ღარიბაშვილი მოქალაქეებს გაესაუბრა. ერთ-ერთმა მათგანმა მინისტრს ყოფილი ხელისუფლების დროს შინაგანი ჯარიდან გათავისუფლებული თანამშრომლების შესახებ ინფორმაცია მიაწოდა და „სამართლიანობის აღდგენაში“ დახმარება სთხოვა. მინისტრს ზუგდიდში ასევე, დაღუპული პოლიციელების მემორიალის გახსნა სთხოვეს.