ზუგდიდის სასწავლო უნივერსიტეტის სტუდენტებს და პროფესორ-მასწავლებლებს დღეს, 16 ოქტომბერს უმრავლესობის წევრი ზაქარია ქუცნაშვილი შეხვდა. მან სტუდენტებთან განათლებისა და თავისუფლების მნიშვნელობაზე ისაუბრა. ქუცნაშვილმა შეხვედრაზე აღნიშნა, რომ რაც შეიძლება მეტმა ახალგაზრდამ უნდა მიიღოს უმაღლესი განათლება. მისივე თქმით, ქვეყნისთვის ასევე ძალიან მნიშვნელოვანია პროფესიული განათლების განვითარება და პოპულარიზაცია. სტუდენტებმა, ქუცნაშვილს კითხვები სწავლის დაფინანსებაზე, სოჭის ოლიმპიადაზე და სამუშაო ადგილების შექმნაზე დაუსვეს. ერთ-ერთი სტუდენტის კითხვაზე, საქართველომ უნდა მიიღოს თუ არა სოჭის ოლიმპიადაში მონაწილეობა, ზაქარია ქუცნაშვილმა უპასუხა, რომ უნდა მიიღოს, თუმცა მისივე თქმით, ის ჩირაღდნის თემამ ძალიან გააღიზიანა. მისი თქმით წინ მთელი სამი თვეა და მარტივად შეიძლება ამ საკითხის გადაწყვეტა. ერთ-ერთმა სტუდენტმა კი, ზაქარია ქუცნაშვილს შენიშვნა მისცა და სთხოვა, რომ დევნილებისთვის „ლტოლვილები“ არ ეწოდებინა. ზუგდიდის სასწავლო უნივერსიტეტის სტუდენმა ასევე აღნიშნა, რომ ის “რეალ-TV“- ის ჟურნალისტი იყო. გარდა ამისა უმრავლესობის წევრმა შეხვედრაზე „ქართული ოცნების“ მიღწევებზე ისაუბრა და განაცხადა, რომ 27 ოქტომბერს დაგეგმილი საპრეზიდენტო არჩევნები ყველაზე დემოკრატიული და თავისუფალი იქნება. ზაქარია ქუცნაშვილი ზუგდიდში კიდევ რამდენიმე დღე დარჩება და წინა საარჩევნო შეხვდრებს ამჯერად სოფლის მოსახლეობასთან გამართავს.