პრემიერ-მინისტრი ბიძინა ივანიშვილი შს მინისტრ ირაკლი ღარიბაშვილს სიჩქარის გადაჭარბებისთვის დაწესებულ 100-ლარიან ჯარიმასთან დაკავშირებით საჯარო განცხადებისა და გადაწყვეტილების არგუმენტირებას სთხოვს. "ვთხოვ ღარიბაშვილს, ტელევიზიით მოვიდეს და გააკეთოს განმარტებები. მახსოვს, მთავრობის სხდომაზე ამ საკითხზე ბევრი პოლემიკა გვქონდა, კარგი იქნება თუ დისკუსია გაიმართება საზოგადოებაშიც. მე მოვითხოვ პოლემიკას და არგუმენტებს. ძალიან ბევრი მძღოლი გაჭირვებულია. კარგია, რომ იცოდეს მოსახლეობამ, რატომ კეთდება ეს", - განაცხადა ბიძინა ივანიშვილმა ტელეკომპანია "კავკასიის" ეთერში. მისივე განმარტებით, მთავრობის სხდომაზე ირაკლი ღარიბაშვილმა სიჩქარის გადაჭარბებაზე 100-ლარიანი ჯარიმის შემოღება მოსახლეობის უსაფრთხოებაზე ზრუნვის მიზეზით დაასაბუთა. "ირაკლიმ დაგვისაბუთა, რომ მოსახლეობის უსაფრთხოებაზე უნდა ვიზრუნოთ და ჯარიმების შემცირება გამოიწვევს მეტ ავარიასო", - აღნიშნა პრემიერმა.