საფეხბურთო კლუბ „ზუგდიდის“ პრობლემბეზე დღეს, 12 ნოემბერს ზუგდიდის საკრებულოს სააქტო დარბაზში იმსჯელეს. შეხვედრას როგორც საკრებულოსა და გამგეობის, ისე ფეხბურთის ქომაგები ესწრებოდნენ. ვეტერანმა ფეხბურთელებმა და საზოგადოება „ზუგდიდელის“ წევრებმა ს/კ „ზუგდიდის“ მოქმედი დირექტორი მალხაზ ჭეჟია არაკომპეტენტურობაში დაადანაშაულეს და მისი თანამდებობიდან გადაყენება მოითხოვეს. ისინი კლუბის დირექტორად ჯონი მალანიას დანიშვნას ითხოვენ. ამასთან, აღნიშნულთან დაკავშირებით, საკრებულოს თავმჯდომარეს ლევან კონჯარიას წერილითაც მიმართეს, რომელსაც ხელს 200-მდე ადამიანი აწერს. როგორ შეხვედრაზე აღნიშნეს, ს/კ „ზუგდიდს“ რთული პერიოდი აქვს, მას უმაღლესი ლიგიდან ემუქრება გავარდნა. „გუნდი კატასტროფულ მდგომარეობაშია. არც სათამაშო დისციპლინა, არც ცხოვრებისეული დისციპლინა, არანაირი მომარაგება...“, - აღნიშნა შეხვედრაზე ზუგდიდის ფეხბურთის ფედერაციის პრეზიდენტმა როლანდ მაქაცარიამ. შეხვედრაზე ასევე არნიშნეს, რომ გუნდის თანხები ხშირ შემთხვევაში არამიზნობრივად იხარჯება. „გუნდს არ გააჩნია ერთნაირი ფორმები, სტადიონი დახაზული არ არის და ფეხბურთელები ნამდვილად თამაშობდნენ „გასკოჩილი“ ბუცებით“, - აცხადებს გუნდის ყოფილი მწვრთნელი კობა წითაიშვილი. შეხვედრაზე ზუგდიდის საკრებულოს თავმჯდომარე ლევან კონჯარია ინიციატივით გამოვიდა და განაცხადა, რომ უნდა შეიქმნას სპეციალური კომისია, რომელიც განიხილავს და გადაჭრის კლუბში არსებულ პრობლემებს. ამასთან, ლევან კონჯარიამ „ზუგდიდის“ ყოფილ მწვრთნელს კობა წითაიშვილს დაავალა, რომ კლუბის ვარჯიში გააგრძელოს. თავის მხრივ, კობა წითაიშვილი აცხადებს, რომ ის მზად არის ფეხბურთელები ავარჯიშოს, თუმცა ის პირობების გაუმჯობესებას ითხოვს. ს/კ „ზუგდიდის“ ადმინისტრაციაში აცხადებენ, რომ ისინი ხვალ, 13 ნოემებრს ადგილობრივი მთავრობის წარმომადგენლებთან გეგმავენ შეხვედრას, სადაც, მათივე განმარტებით, კლუბში შექმნილ პრობლემებზე ერთად იმსჯელებენ. ცნობისთვის, „ზუგდიდის“ მთავარმა მწვრთნელმა კობა წითაიშვილმა და სამმა წამყვანმა ფეხბურთელმა კლუბი რამდენიმე კვირს წინ, პროტესტის ნიშნად, დატოვეს.