რუსეთის პრეზიდენტი ვლადიმერ პუტინი ყირიმის რუსეთის ფედერაციაში მიღების შესახებ შეთანხმებაზე ხელის მოწერას მიზანშეწონილად მიიჩნევს. "რია ნოვოსტის" ინფორმაციით, ამის შესახებ რუსეთის პრეზიდენტის განკარგულებაშია ნათქვამი. მათივე ინფორმაციით, პრეზიდენტმა პუტინმა დაამტკიცა რუსეთსა და ყირიმს შორის მოლაპარაკებების პროექტი, რომელიც ყირიმის რუსეთის შემადგენლობაში მიღებას გულისხმობს. "მიზანშეწონილად მივიჩნევ, ხელი მოვაწერო შეთანხმებას",- ნათქვამია განკარგულებაში. როგორც ცნობილია, რუსეთის პრეზიდენტმა ვლადიმერ პუტინმა "ყირიმის რესპუბლიკის აღიარებასთან დაკავშირებით" ბრძანებას გუშინ მოაწერა ხელი. "2014 წლის 16 მარტის ყირიმის საყოველთაო რეფერენდუმზე ყირიმელთა ნების გამოხატვის გათვალისწინებით, ყირიმის რესპუბლიკა, რომლის ქალაქ სევოსტოპოლს განსაკუთრებული სტატუსი აქვს, ცნობილ იქნას დამოუკიდებელ, სუვერენულ სახელმწიფოდ", - ნათქვამია დოკუმენტში. ბრძანების თანახმად, დოკუმენტი ძალაში შედის ხელმოწერისთანავე.