უკრაინელ სამხედროებს, რომლებიც ყირიმში მსახურობენ, იარაღის გამოყენების უფლება მისცეს, - განცხადებას ქვეყნის თავდაცვის სამინისტრო ავრცელებს. “უკრაინელი სამხედრო პირის გარდაცვალებასთან დაკავშირებით, რომლის დაღუპვის მიზეზიც რუსეთის ფედერაციის შეიარაღებული ძალების სამხედრო ფორმაში გამოწყობილი ადამიანების თავდასხმა გახდა, უკრაინელი სამხედროების სიცოცხლის დაცვისა და შენარჩუნებისთვის, ყირიმში განთავსებულ სამხედროებს მიეცათ იარაღის გამოყენების უფლება”, - ნათქვამია განცხადებაში. უკრაინის ხელისუფლებამ რუსეთის საზღვარზე სამხედროების მობილიზება მოახდინა. ვლადიმერ პუტინის ქმედებებს კი თანამედროვე ნაციზმად აფასებს უკრაინის მოქმედი პრეზიდენტი. განცხადებებს აკეთებს ყირიმის ეგრეთწოდებული პრემიერი. მისი თქმით, უახლოეს მომავალში ყირიმელი სამხედროები ჩეჩნეთსა და დაღესტანში დაიწყებენ სამსახურს. გასულ ღამეს ყირიმში რადიო “თავისუფლების” ჟურნალისტი გაიტაცეს. უკრაინული მედია ასევე ავრცელებს ცნობას, რომ ნახევარკუნძულზე მდებარე საეკლესიო ქონების აღწერა მოსკოვის საპატრიარქოს წარმომადგენლებმა დაიწყეს.