ევროკავშირმა საქართველოს შესახებ ანგარიში მოამზადა. დოკუმენტში საუბარია იმ პროგრესზე, რომელსაც ქართულმა მხარემ ევროპული სამეზობლო პოლიტიკის განხორციელებასთან დაკავშირებით 2013 წელს მიაღწია. ევროკომისიის დოკუმენტის შეფასებით, 2013 წელსა და 2014 წლის დასაწყისში საქართველოს მთავრობამ შეძლო წარმატებით გადაელახა ხელისუფლების გადაბარების კომპლექსური და უპრეცენტენდო ეტაპი, რეფორმებისა და ევროკავშირთან დაახლოების პროცესის შეუფერხებლად. დოკუმენტში ხაზგასმულია ასოცირების შესახებ შეთანხმებაზე მოლაპარაკებების წარმატებით დასრულების ფაქტი, რომელიც ევროკავშირის პოზიციით, ადასტურებს საქართველოს ერთგულებას ევროპული ინტეგრაციის კურსისადმი. ევროკავშირი დადებითად აფასებს საქართველოს მთავრობის ძალისხმევას კორუფციის წინააღმდეგ ბრძოლის, სასამართლოს დამოუკიდებლობის გაძლიერების, მედიაგარემოსა და პენიტენციურ სისტემაში ვითარების გაუმჯობესების თვალსაზრისით. ანგარიშში მოყვანილია რეკომენდაციებიც, თუ რა სახის სამუშაოებია ჩასატარებელი კონკრეტულ სფეროებში. კერძოდ, დოკუმენტი მოუწოდებს ხელისუფლებას სასამართლო სისტემის რეფორმირებისკენ, გამჭვირვალე, მიუკერძოებელი გამოძიების უზრუნველყოფისა და პოლიტიკურად მოტივირებული სასამართლოს აღქმის თავიდან აცილებისკენ. `ევროკავშირი საჭიროდ მიიჩნევს, რომ ყოფილი მაღალჩინოსნების პროცესები იყოს ობიექტური, გამჭვირვალე და მტკიცებულებებით გამყარებული," - ნათქვამია ანგარიშში. ევროკომისიის დოკუმენტის თანახმად, ქვეყანამ გასული წლის რეკომენდაციების უმეტესობა შეასრულა.