რუსეთის მიერ ყირიმის ანექსიას აშშ კვლავ უკანონოდ და არალეგიტიმურად მიიჩნევს. ამის შესახებ აშშ-ის სახელმწიფო მდივანმა, ჯონ ქერიმ რუსეთის საგარეო საქმეთა მინისტრ, სერგეი ლავროვთან პარიზში გამართული შეხვედრისას განაცხადა. ინფორმაციას "ბიბისი" ავრცელებს. ამასთან, ჯონ ქერის თქმით, პარიზში რუს კოლეგასთან გამართული ოთხსაათიანი გულახდილი მოლაპარაკებები უკრაინის თაობაზე, კვლავ წარუმატებლად დასრულდა. "ჩვენ არ მივიღებთ არანაირ გადაწყვეტილებას უკრაინის მომავალთან დაკავშირებით, უკრაინის ლეგიტიმური მთავრობის მონაწილეობის გარეშე. ეს პრინციპი ცხადია – არანაირი გადაწყვეტილება უკრაინის თაობაზე, უკრაინის გარეშე", - განაცხადა ჯონ ქერიმ სერგეი ლავროვთან შეხვედრის შემდეგ გამართულ პრესკონფერენციაზე. როგორც აშშ-ს სახელმწიფო მდივანმა პრესკონფერენციაზე აღნიშნა, შეხვედრაზე მან ასევე ძლიერი შეშფოთება გამოთქვა რუსეთის ჯარების უკრაინის საზღვრებთან ყოფნის გამო და კიდევ ერთხელ ხაზი გაუსვა, რომ რუსეთმა უნდა გაიყვანოს ჯარები უკრაინის საზღვრებიდან. ამასთან, "ბიბისი"-ს ცნობით, თავის მხრივ, რუსეთის საგარეო საქმეთა მინისტრმა, სერგეი ლავროვმა უარყო უკრაინაში შეჭრის ყველანაირი გეგმა. რუსული მედიის ინფორმაციით, როგორც სერგეი ლავროვმა ბრიფინგზე განაცხადა, მოსკოვი და ვაშინგტონი აპირებენ ითანამშრომლონ უკრაინის ხელისუფლებასთან უკრაინის რუსულენოვანი მოსახლეობის უფლებების დაცვისა და პროვოკატორების განიარაღების საკითხში. ამასთან, სერგეი ლავროვმა ჯონ ქერისთან შეხვედრისას მოითხოვა უკრაინის ახალი კონსტიტუციის მიღება, რომელიც უკრაინას ფედერალურ და ნეიტრალურ სახელმწიფოდ გამოაცხადებს.