შალვა თათუხაშვილზე ნამდვილად მოხდა ზეწოლა, თუმცა ვის მიერ, ამას გამოძიება დაადგენს , – განაცხადა ჟურნალისტებთან საუბარში ფრაქცია ,,ქართული ოცნების" ლიდერმა გია ვოლსკიმ. მისი თქმით, ზეწოლა, სავარაუდოდ იმ ადამიანებმა მოახდინეს, რომელთაც არ სურდათ, რომ შალვა თათუხაშვილი ბრალდების მოწმე ყოფილიყო. "ნაციონალური მოძრაობა" ცდილობს თავის მართლება შეტევით რეჟიმში გადაიტანოს და ბრალი დასდოს ხელისუფლებას. კონკრეტული სახელებისა და გვარების დასახელება, საგამოძიებო კომისიის შექმნის მოთხოვნა, პანიკურ შიშს ჰგავს მათი მხრიდან. პროკურატურამ გამოარკვია, რომ გარდაცვალებამდე თათუხაშვილი არ იყო დაკარგული. ადამიანის უფლებათა კომიტეტის სხდომაზე იქნება კითხვები, რომელსაც ჩვენ აუცილებლად დავსვამთ. პროკურატურისათვის ეს ადამიანი ძალიან მნიშვნელოვანი მოწმე იყო," - ამბობს ვოლსკი. შალვა თათუხაშვილის საქმესთან დაკავშირებით, დღეს, პარლამენტის ადამიანის უფლებათა დაცვის კომიტეტის საგანგებო სხდომა გაიმართება. გუშინ პროკურატურამ შალვა თათუხაშვილის გარდაცვალების მიზეზების დასადგენად დაწყებული გამოძიების საქმეში არსებულ გარემოებები გაასაჯაროვა. შალვა თათუხაშვილი პროკურატურის მოწმე იყო დათა ახალაიას, კერძოდ, ე.წ. ნავთლუღის სპეცოპერაციის საქმეზე. მისი გარდაცვალების შესახებ ინფორმაცია 24 მარტს გავრცელდა.