წინასაარჩევნოდ საჯარო მოხელეთა ქმედებებთან დაკავშირებით სამინისტროებმა სპეციალური ბრძანებები გამოსცეს, - ამის შესახებ ინფორმაცია იუსტიციის მინისტრმა თეა წულუკიანმა უწყებათაშორის კომისიას მიაწოდა. "ჩვენ გავეცით რეკომენდაცია, რომ ყველა სამინისტროს ბრძანების რანგში აეყვანა ინსტრუქცია, თუ რა არის საჯარო მოხელისათვის ნებადართული წინასაარჩევნოდ და რა - არა. კომისიის წევრმა ყველა სამინისტრომ შესასრულებლად სავალდებულო ინსტრუქციები გამოსცა. ყველა მინისტრმა ხელი მოაწერა ბრძანებას, რათა მათმა საჯარო მოხელეებმა სავალდებულო წესით იცოდნენ, როგორ უნდა მოიქცნენ წინასაარჩევნო პერიოდში. უფრო მეტიც, ასეთი ბრძანებები გამოსცეს უწყებათაშორისო კომისიის არაწევრმა სამინისტროებმაც. ეს ბრძანებები ძალაშია და ყველა საჯარო მოხელე ვალდებულია ერთმანეთისგან გამიჯნოს პოლიტიკური ძალა, მმართველი ძალა და პოლიტიკა და სახელმწიფო", - განაცხადა თეა წულუკიანმა უწყებათაშორისო კომისიის სხდომის დაწყებისას. მან კიდევ ერთხელ მოუწოდა ყველა საჯარო მოხელეს, მათ შორის ადგილობრივ ორგანოებში დასაქმებულ პირებს, ზედმიწევნით ზუსტად დაიცვან ინსტრუქციები და რეკომენდაციები. თეა წულუკიანის თქმით, ყველა დარღვევას მკაცრი რეაგირება მოჰყვება. მინისტრმა კიდევ ერთხელ აღნიშნა, რომ ყველა კანდიდატს უნდა მიეცეს საშუალება, თანაბარ პირობებში წარმართოს საარჩევნო კამპანია, ხოლო საბოლოო არჩევანს თავად ამომრჩეველი გააკეთებს.