„შიშის სინდრომი“ - ამ თემაზე იმსჯელეს დღეს ზუგდიდში „დემოკრატიული ჩართულობის ცენტრში“. შეხვედრის ორგანიზატორმა „თავისუფალი დემოკრატების ზუგდიდის ოფისმა“ „კვლევის“ შედეგები არასამთავრობო ორგანიზაციებისა და პოლიტიკური პარტიების წარმომადგენლებს გააცნო. ფსიქოლოგებმა შიშის ფაქტორების პრეზენტაცია გამართეს და დარბაზში შეკრებილ ზუგდიდელებს გამოსავლის ძიების გზებზე უამბეს. რისი ეშინიათ ყველაზე მეტად ზუგდიდელებს? - "თავისუფალი დემოკრატების" "კვლევის" მიხედვით, ხალხს აქვს ტელეფონის (მათ შორის გამორთულის), უკანონო მოსმენების, ბიზნესზე ზეწოლის, სამსახურის, სოციალური დახმარებისა და ქონების დაკარგვის შიში... როგორც "თავისუფალი დემოკრატები" ამბობენ, "კვლევის" შედეგები რეალურ ფაქტებს ეყრდნობა, თუმცა რესპონდენტთა უსაფრთხოების დაცვის მიზნით, ვინაობის გამხელისგან თავს იკავებენ. პრეზენტაციის ავტორებს არ უთქვამთ, "კვლევა" ვისი დაკვეთით ჩატარდა, მასში რამდენი რესპონდენტი მონაწილეობდა, ან ეს რესპონდენტები რა პრინციპით შეირჩა და საერთოდ, სოციოლოგიური თვალსაზრისით, რამდენად სანდოა წარმოდგენილი შედეგები. დღეს, ზუგდიდში შეკრებილი პოლიტიკური პარტიების წარმომადგენლები აცხადებდნენ, რომ ხელისუფლება სწორედ დაშინების მეთოდით ცდილობს საზოგადოების დამორჩილებას.