"რია ნოვოსტის" რუსეთის საგარეო საქმეთა მინისტრის მოადგილე გრიგორი კარასინმა განუცხადა, რომ საქართველოსა და რუსეთს აქვთ შესაძლებლობა, გააჯანსაღონ ურთიერთობა. კარასინი ჟენევაში საქართველოს პრემიერ-მინისტრის სპეციალურ წარმომადგენელს რუსეთთან ურთიერთობების საკითხში ზურაბ აბაშიძეს შეხვდა. "ყველა სირთულის არსებობის შემთხვევაში, რომელიც სააკაშვილის მმართველობის პერიოდში დაგროვდა, ამ ურთიერთობების გაჯანსაღების შესაძლებლობები მაინც არსებობს, ეს ეხება კონკრეტულ სფეროებს – ვაჭრობას, ტრანსპორტს, ავიამიმოსვლას, კულტურულ-ჰუმანიტარულ სფეროებს. დღევანდელ შეხვედრასთან დაკავშირებით კარასინმა განაცხადა, რომ საუბარი "საქმიანად და საკმაოდ ინფორმატიულად წარიმართა". "ჩვენ აღვნიშნეთ, რომ ორმხრივი სახელმწიფოთაშორისი ურთიერთობა საქართველოსა და რუსეთს შორის ჩიხშია შესული, საჭიროა მათი გაჯანსაღება და ურთიერთქმედების კონკრეტული ფორმის მიცემა ისე, რომ არ დაზარალდეს რუსეთის პოლიტიკური პოზიცია. სწორედ ამას ეძღვნებოდა ეს პირველი შეხვედრა", – აღნიშნა რუსეთის ოფიციალურმა წარმომადგენელმა. მისივე თქმით, მხარეები შეთანხმდნენ, გამონახონ დრო და ადგილი ამ დიალოგის გასაგრძელებლად. კარასინის განცხადებით, არის მცდელობა გამოინახოს გადაწყვეტილება, რომელიც ორივე ქვეყნის ინტერესებთან შესაბამისობაში იქნება.