„ქართული ოცნებიდან“ ზუგდიდის მაჟორიტარობის კანდიდატი ირაკლი ჩიქოვანი გამარჯვებაში დარწმუნებულია. ამის შესახებ ჩიქოვანმა ჟურნალისტებს წარდგენის შემდეგ განუცხადა. ჩიქოვანი დასძენს, რომ მმართველი პარტიის ბრძოლა სამართლიანი და თანმიმდევრული იქნება.


„დარწმუნებული ვარ, ზუგდიდში ჩვენ მოვიპოვებთ გამარჯვებას. მჯერა, ზუგდიდელების მხარდაჭერის და მჯერა ზუგდიდში ნამდვილად არის ის მხარდაჭერა „ქართული ოცნების“ მიმართ, რომლის შედეგადაც ჩვენ ქვეყანას კიდევ უფრო განვავითარებთ, კიდევ უფრო დემოკრატიულს გავხდით და ეკონომიკურად კიდევ უფრო გაძლირებული იქნება. „ქართული ოცნების“ წარმატება არის საქართველოს წარმატება, როგორც ქვეყნის ევროპული მომავლის უზრუნველმყოფელი ძალის. მიუხედავად იმისა, თუ ვინ იქნება კონკურენტი და რამდენი იქნება, ეს არის დემოკრატიული პროცესი და გუნდი, რომელიც ზუგდიდშია და მხარდაჭერა, რომელსაც მე ჩემი თანაქალაქელების მხრიდან ვგრძნობ, მაძლევს ასე საუბრის საფუძველს. ნამდვილად წარმატებით დავასრულებთ ამ ბრძოლას,“ - განაცხადა ირაკლი ჩიქოვანმა.

გარდა ამის, ჩიქოვანმა ანაკლიის პორტზეც ისაუბრა და თქვა, რომ მას "ქართული ოცნების" ხელისუფლება ააშენებს.

"არა მხოლოდ ზუგდიდისთვის, მთლიანად საქართველოსთვის, ანაკლიის პორტს აქვს უმნიშვნელოვანესი როლი და ეს როლი ჩვენ და "ქართული ოცნების" ხელისუფლებასაც კარგად ესმის. მიუხედავად იმისა, რომ არსებობს ძალიან ბევრი პოლიტიკური სპეკულაცია. მინდა გითხრათ, რომ ეს მხოლოდ და მხოლოდ პოლიტიკური სპეკულაციაა, ანაკლიის პორტს "ქართული ოცნების" ხელისუფლება ნამდვილად ააშენებს, ნამდვილად იქნება ერთ-ერთი მნიშვნელოვანი ეკონომიკური პროექტი", - დასძინა ჩიქოვანმა.

2020 წლის საპარლამენტო არჩევნებში სამეგრელოს რეგიონის სამ ოლქში მაჟორიტარობისთვის ალექსანდრე მოწერელია, ირაკლი ხახუბია და ირაკლი ჩიქოვანი იბრძოლებენ.