სოხუმში ეროვნული ბანკის ბაზაზე ადგილობრივი ფულის მუზეუმის გახსნა იგეგმება. იდეის ავტორების მიზანია, მეტი ინფორმაცია მიაწოდონ მნახველებს აფხაზეთში ფულის მიმოქცევის ისტორიაზე.
მუზეუმის შექმნის იდეას მხარს უჭერს ადგილობრივი კოლექციონერი ასტამურ ტანია, რომელიც თვლის, რომ ნუმიზმატიკისა და ბონისტიკის საკითხების შესახებ შემორჩენილი მწირი ინფორმაციის მიუხედავად, "აფხაზეთის ტერიტორიაზე მუდმივად ვითარდებოდა სავაჭრო - ეკონომიკური ურთიერთობები და აქტიურად ბრუნავდა სხვადასხვა ვალუტა".

"ფულის ნიშნები ძვ.წ. VII საუკუნეში გაჩნდა, ხოლო აფხაზეთში ფულის მიმოქცევა ძვ.წ. VI საუკუნეში დაიწყო. ესე იგი, აფხაზეთის და კაცობრიობის ისტორიის ეს სეგმენტი ერთმანეთს ემთხვევა", - აღნიშნა ტანიამ.

ისტორიკოსის და ყოფილი პრემიერ - მინისტრის სერგეი შამბას თქმით, ის, რომ ბანკში ფული არ არის, არ ნიშნავს ამ იდეის განხორციელებაზე უარის თქმას. ის დარწმუნებულია, რომ "აუცილებლად უნდა მოხდეს ფულის მიმოქცევის მდიდარი ისტორიის დემონსტრირება", რათა ის დარჩეს საზოგადოების მეხსიერებაში.

"თქვენ იცით, რომ ჩვენი ტერიტორია ყოველთვის იყო მოქცეული ისტორიული ურთიერთქმედების სფეროში, პოლიტიკური არენის ისეთ მნიშვნელოვან მოთამაშეებთან, როგორიცაა ძველი საბერძნეთი, ძველი რომი, ბიზანტია. აქ არაბული და მონღოლური მონეტები იყო მიმოქცევაში, არაფერს ვამბობ რუსეთის იმპერიის პერიოდზე", - ამბობს შამბა.

ფულის მუზეუმის შექმნის იდეა აფხაზეთის ეროვნული ბანკის ხელმძღვანელს ბესლან ბარათელიას ეკუთვნის. დაახლოებით 10 წლის წინ, აფხაზეთის ბანკმა სხვადასხვა თარიღისადმი მიძღვნილი სამახსოვრო მონეტების გამოშვება დაიწყო. მათი ნომინალი აფსარით განისაზღვრა. ეს ფულის ერთეული ოფიციალური ვალუტაა და მიბმულია რუსეთის ფედერაციის რუბლზე. 1 აფსარი - 10 რუსული რუბლის ეკვივალენტია.

ბარათელიას თქმით, "იმის მიუხედავად, რომ მას შემდეგ, მხოლოდ ათი წელია გასული, აფხაზეთის ბანკის მიერ გამოშვებული საიუბილეო მონეტების ჩამონათვალიდან, ზოგიერთი უკვე გაყიდვაში აღარ არის".

"ოქროს და ვერცხლის მონეტა "ვლადისლავ არძინბა", "ფაზილ ისკანდერი", "ნართები", უკვე აღარ არის გაყიდვაში. მათ ვერანაირ ფასად ვერ შეიძენთ. ისტორიული პროცესისთვის ეს უმნიშვნელო პერიოდია, მხოლოდ 10 წელი გავიდა, მაგრამ ჩვენ უნდა ვიფიქროთ მომავალზე, ჩვენს შთამომავლობაზე - იმაზე, რომ ამ გზით ვქმნით ისტორიას. საჭიროა შევქმნათ ფონდები, რათა შეგროვდეს მასალა. 20-50 წელიწადში გაქრება ის მონეტებიც, რომლებიც ახლა არის ხელმისაწვდომი", - ამბობს ბარათელია.

მუზეუმის პროექტის დიზაინერი კამა კაცია ამბობს, რომ მას სურდა შეექმნა გარკვეული სივრცე, რომელიც სტილისტურად შესაბამისობაში მოდის, როგორც ნაციონალურ ბანკთან, ისე ზოგადად, ფულის იდეასთან.

"შევარჩიე ფულის და სიმდიდრის სტერეოტიპული წარმოდგენა - გამოვიყენე ისეთი მასალები, რომელიც ოქროსთან ასოცირდება, მაგალითად - ონიქსი, ან თითბერი - ორნამენტებისთვის".

ფულის მუზეუმი ნაციონალური ბანკის მარცხენა ნაწილში გაიხსნება. პროექტის ავტორების ინფორმაციით, ვიზიტორები იქ ბუკლეტებისა და სამახსოვრო მონეტების შეძენასაც შეძლებენ.

მასალა მომზადებულია გადაცემა "Точки соприкосновения" - ს მიხედვით, რომელიც გადის რადიო "ათინათის" ეთერში. პროექტი ხორციელდება აფხაზ პარტნიორებთან თანამშრომლობით. მასალა შესაძლოა შეიცავდეს ტერმინებს, რომლებსაც აფხაზეთის დე ფაქტო რესპუბლიკაში იყენებენ.