აფხაზეთის დე ფაქტო რესპუბლიკის ე.წ. უშიშროების საბჭოს მდივანი სერგეი შამბა საქართველოს პრემიერ-მინისტრ ირაკლი კობახიძის განცხადებას ეხმაურება, რომლის თქმითაც, საქართველოს ხელისუფლების მიზანი აფხაზეთისა და ცხინვალის დაბრუნება და 2030 წელს ევროკავშირში შესვლაა.

"ტასს" - თან საუბარში შამბამ განაცხადა, რომ "საქართველოს სურვილი აფხაზეთისა და სამხრეთ ოსეთის დაბრუნების თაობაზე" არავის აკვირვებს.

"30 წელია უნდათ ჩვენი დაბრუნება, კიდევ 300 წელი ენდომებათ, გასაგებია, რომ ეს მათი საგარეო პოლიტიკური ამოცანაა და ჩვეთვის ახალი ამბავი არ არის. აფხაზეთს საკუთარი ამოცანები აქვს, ააშენოს დამოუკიდებელი სახელმწიფო, განავითაროს და გააძლიეროს თავისი სახელმწიფოებრიობა", - განაცხადა მან.

მის თქმით, მხარეებს შორის ბევრი გადაუწყვეტელი პრობლემა არსებობს, თუმცა, ამ ეტაპზე, სოხუმი თბილისთან "კონფედერაციის ან რაიმე სხვა სახის ურთიერთობის განხილვას არ აპირებს".

„ჩვენ ვუსურვებთ საქართველოს სტაბილურობას და უსაფრთხოებას, ისინი თავისი გზით მიდიან, ჩვენ კი ჩვენი გზით“, -  უთხრა გამოცემას შამბამ.

საქართველოს დამოუკიდებლობის დღისადმი მიძღვნილ საზეიმო ღონისძიებაზე სიტყვით გამოსვლისას, საქართველოს პრემიერ-მინისტრმა, ირაკლი კობახიძემ განაცხადა: "ჩვენი "აღთქმული მიწა", ანუ ქართული ოცნებაა, საქართველოს დამოუკიდებლობის აღდგენიდან 40 წლის თავზე - 2030 წელს ვიცხოვროთ ერთიან და ძლიერ საქართველოში ჩვენს აფხაზ და ოს ძმებთან და დებთან ერთად, ერთიანი და ძლიერი საქართველო უნდა გახდეს 2030 წელს ევროპული ოჯახის სრულუფლებიანი წევრი".