აფხაზეთის დე ფაქტო რესპუბლიკის ახლად დანიშნულმა „საგარეო საქმეთა მინისტრმა“ სერგეი შამბამ განაცხადა, რომ ოჩამჩირეში რუსული საზრვაო ფლოტის მუდმივი ბაზის განთავსება არ იგეგმება.

ამის შესახებ მან რუსეთის ფედერაციასთან უსაფრთხოების საკითხებში თანამშრომლობაზე საუბრისას „რია ნოვოსტის“ უთხრა.

„რესპუბლიკაში მე -7 რუსული სამხედრო ბაზაა განთავსებული და რუსეთის სასაზღვრო ჯარები ძალიან მნიშვნელოვან როლს ასრულებენ აფხაზეთში უსაფრთხოების უზრუნველყოფაში, განსაკუთრებით იმის გათვალისწინებით, რომ საქართველო უარს ამბობს ძალის გამოუყენებლობის შესახებ იურიდიულად სავალდებულო დოკუმენტზე ხელმოწერაზე. ზოგადად, როგორც ზემოთ ვთქვი, საერთაშორისო ურთიერთობებს სერიოზული ტურბულენტობა ახასიათებს და ამის გათვალისწინებით, ამ თვალსაზრისით მნიშვნელოვანია აფხაზეთ-რუსეთის თანამშრომლობა უსაფრთხოების სფეროში. რაც შეეხება ოჩამჩირის პორტს, აქ საზღვაო ბაზის გახსნაზე არ არის საუბარი“, - აღნიშნა შამბამ.

მანამდე, მედიაში გავრცელდა ინფორმაცია, რომ ოჩამჩირეში, პორტის მიმდებარე ტერიტორიაზე, საკონტეინერო ტერმინალი შენდება, ე.წ. პრეზიდენტის ასლან ბჟანიას დავალებით „საერთაშორისო სატრანსპორტო კორიდორის განვითარებისთვის“.

გასული წლის ოქტომბერში ბჟანიამ განაცხადა, რომ ოჩამჩირის რაიონში რუსული სამხედრო-საზღვაო ფლოტის მუდმივი ბაზის განთავსება იგეგმება.